Nashik Youth Festival : मोदी मैदानासह क्रीडासंकुलाची स्वच्छता; प्रत्येक राज्यातून 100 युवक-युवती

Nashik Youth Festival : युवा दिनानिमित्त शहरात होणाऱ्या राष्ट्रीय युवक महोत्सवाचे उद्‌घाटन पंचवटीतील मोदी मैदानावर होणार आहे, तर समारोप विभागीय क्रीडासंकुलात होणार आहे. त्यामुळे या परिसराच्या स्वच्छतेला गती आली आहे.

केंद्र शासनाच्या माध्यमातून महोत्सवाच्या आयोजनाची जबाबदारी राज्य शासनाला मिळाली आहे. (Cleaning of sports complex including Modi Maidan for youth festival nashik news)

शहरातील चार ठिकाणी १२ ते १६ जानेवारीदरम्यान २७ वा राष्ट्रीय युवा महोत्सव होत आहे. त्यामध्ये देशातील सर्व राज्ये व केंद्रशासित प्रदेशातील युवक-युवती सहभागी होतील. त्यासाठी परिसराच्या स्वच्छतेला वेग आला असून, महापालिकेतर्फे ठिकठिकाणी साचलेले कचऱ्याचे ढिगारे उचलण्यात आले.

तर रस्त्याच्या कडेचा गवत कचरा उचलण्यात आला. मोदी मैदानावरील स्ट्रेट लाइटची दुरुस्तीही करण्यात आली. लवकरच या ठिकाणी भव्य मंडप उभारण्यात येणार आहे. महोत्सवात २८ राज्ये आणि आठ केंद्रशासित प्रदेशातील प्रत्येकी १०० युवक-युवती राष्ट्रीय सेवा योजना युवा स्वयंसेवक, नेहरू युवा केंद्र संघटन युवा स्वयंसेवक असा सुमारे आठ हजार व्यक्तींचा सहभाग असणार आहे.

१२ जानेवारीला या महोत्सवाचे उदघाटन पंतप्रधान नरेंद्र मोदी यांच्या हस्ते होईल. शहरातील तपोवन मैदानावर हा समारंभ होईल. महोत्सवांतर्गत सांस्कृतिक, कौशल्य विकास, युवा कृती असे स्पर्धात्मक कार्यक्रम होणार आहेत. त्यामध्ये समूह लोकनृत्य, लोकगीत, कथा लेखन, पोस्टर स्पर्धा, वक्तृत्व, छायाचित्र, हस्तकला, वस्त्रोद्योग, कृषी उत्पादने यांचा समावेश असणार आहे.