कृषी कायद्यांविरोधात काँग्रेसतर्फे शेतकरी परिषदेचे आयोजन

नाशिक : भाजपा सरकारने मंजूर केलेले शेती विषयक तीन कायदे हे देशातील शेतकरी, शेतमजूर व हरित क्रांती नष्ट करण्यासाठी आणि खाजगी उद्योगपतींना बळ देण्यासाठी आहेत, असा ठपका ठेवत त्यांना विरोध आणि शेती कशी नष्ट होणार आहे त्याची जनजागृती करण्यासाठी नाशिक जिल्ह्यातील शेतकरी व शेतकरी परिषदेच्या माध्यमातून 29 ऑगस्ट रोजी शेतकरी परिषद आयोजित करण्यात आली आहे.

या कार्यक्रमासाठी नाशिक जिल्ह्यातील शहरी व ग्रामीण भागातील लोक सहभागी होणार आहे. या शेतकरी परिषदेच्या माध्यमातून भाजपा सरकारने पारित केलेल्या शेतकरी कायद्यांचे वास्तव जाणून घेण्यासाठी शेतकरी, शेतमजूर, कामगार, काँग्रेस पक्षाचे पदाधिकारी व कार्यकर्ते हे ही यात मोठया प्रमाणात सहभागी होणार आहे.

मंत्री बाळासाहेब थोरात राहणार उपस्थित

काँग्रेसचे नाशिक शहर(जिल्हा)अध्यक्ष शरद आहेर यांनी सांगितले की 29 ऑगस्ट रोजी आयोजित शेतकरी वाचवा शेतकरी परिषदेला राज्यांचे महसूलमंत्री काँग्रेस पक्षाचे विधिमंडळ नेता तसेच नाशिक जिल्ह्याचे संपर्क मंत्री मा.नामदार बाळासाहेब थोरात उपस्थित राहणार आहेत, तरी जिल्ह्यातील शेतकरी बांधवांनी नागरीकांनी उपस्थित रहावे असे आवाहन काँग्रेसचे शहर जिल्हा अध्यक्ष शरद आहेर, ग्रामीण काँग्रेसचे अध्यक्ष डॉ. तुषार शेवाळे, किसान सेलचे अध्यक्ष रामुदादा शिंदे यांनी केले आहे.

या शेतकरी बचाव मोहिमेत मोठ्या संख्येने सहभाग घेऊन शेतकऱ्यांच्या पाठीशी उपस्थित राहून उभे रहावे असे आवाहन काँग्रेसचे अध्यक्ष शरद आहेर यांनी केले आहे.