Nashik News : वऱ्हाडी मंडळींना 1111 केशर आंबा रोपांचे वाटप

Nashik News : लग्नांमध्ये यापूर्वी वधूवरांना आशीर्वाद देत आहेर देण्याची पद्धत होती. काळानुरूप रूढी, परंपरा मागे पडत चालल्या आहे. गिते कुटुंबीयांनी परंपरागत हुंडा, आहेर कालबाह्य प्रथा मागे टाकत, विवाहप्रसंगी वृक्षदान केले.

विवाहास वधू- वराला आशीर्वाद देण्यासाठी आलेल्या उपस्थितांकडून गिते कुटुंबीय यांनी सुरू केलेल्या संकल्पनेचे कौतुक होत होते. (Distribution of 1111 saffron mango saplings to bridegrooms relatives Nashik News)

संगमनेर तालुक्यातील सोनाशी येथील भाऊसाहेब कारभारी गिते यांचे चिरंजीव तुषार आणि सिन्नर तालुक्यातील पाटोळे येथील सोमनाथ कराड यांची कन्या शोभा यांचा रविवारी (ता. ३०) विवाह होता.

याप्रसंगी कारभारी (दादा) शिवार प्रतिष्ठानतर्फे ११११ केशर आंबा रोपांचे वाटप करत काळाशी सुसंगत अशी नवी प्रथा सुरू करण्यात आली. वर व वधु हे दोघेही स्थापत्य अभियंता आहेत. नाशिकचे जलसंधारण अभियंता हरिभाऊ गिते आणि संरक्षण मंत्रालयात कार्यरत शास्त्रज्ञ डॉ. एल. के. गिते यांच्या कल्पनेतून हा अभिनव उपक्रम राबविला.

हेही वाचा : संतुलित आहारातून रोखा फॅटी लिव्हरचा आजार

याप्रसंगी उपस्थित झालेले माजी मंत्री तथा आमदार बाळासाहेब थोरात, आमदार हिरामण खोसकर, माजी आमदार सुधीर तांबे, माजी आमदार राजाभाऊ वाजे, इंद्रभान थोरात, उदय सांगळे यांनी या काळाशी सुसंगत उपक्रमाचे कौतुक केले.

एरवी एखाद्या लग्न कार्यात गेले की, सर्वसाधारणपणे वधूवरांना आशीर्वाद देत त्यांना भेटवस्तू दिली जाते. मात्र, गिते कुटुंबीयांनी कुठलीही भेटवस्तू न स्वीकारली नाही. एक नवीन प्रथा पाडत, आशीर्वाद देण्यासाठी आलेल्यांना केशर आंब्याचे रोप देत होते आणि वऱ्हाडी मंडळी पण हातात आंब्याचे रोपटे घेऊन आनंदाने घरी जात होती.