नाशिक जिल्‍ह्यास अवकाळीची तीन कोटींची मिळाली नुकसानभरपाई

नाशिक: गेल्‍या फेब्रुवारीत अवकाळी पाऊस व गारपिटीने झोडपल्‍याने जिल्‍ह्यात शेतीचे नुकसान झाले होते. या संदर्भात सुमारे पाच महिन्‍यांनंतर शासनातर्फे नुकसानभरपाईपोटी जिल्‍ह्याला तीन कोटी दोन लाख ९८ रुपये प्राप्त झाले आहेत. ही मदत शेतकऱ्यांच्या बँक खात्‍यात वर्ग केली जात असून, सर्वाधिक दीड कोटीची मदत बागलाण तालुक्‍यास मिळाली आहे.

वातावरणातील बदलांसह अवकाळीच्‍या संकटाला शेतकऱ्यांना सामोरे जावे लागते आहे. या वर्षी फेब्रुवारीत पूर्ण राज्‍याला अवकाळी पाऊस व गारपिटीने झोडपले होते. नाशिक जिल्‍ह्यातील शेतीचेही नुकसान झाले होते. यात गहू, मका, सोयाबीन, कांदा यासह डाळिंबबागांना फटका बसला होता. जिल्‍ह्यातील आठ तालुक्यांतील १८७ गावांमध्ये नुकसान झाल्‍याचे नोंदविले होते. प्रामुख्याने बागलाण तालुक्‍यातील डाळिंबबागांना अवकाळीचा सर्वांत मोठा फटका बसला होता. त्यावेळी शासनाने जिल्‍हा प्रशासनास पंचनामे करून सविस्‍तर अहवाल सादर करण्याचे आदेश दिले होते. त्‍यानुसार पंचनामे पूर्ण करत शासनाकडे आर्थिक मदतीचा प्रस्‍ताव पाठविला होता. साधारणतः सहा महिन्यांनी शासनाकडून जिल्ह्यासाठी आर्थिक मदत प्राप्त झाली आहे. थेट शेतकऱ्यांच्‍या बँक खात्‍यावर मदतीची रक्‍कम वर्ग केली जात आहे.

दरम्‍यान, बागलाण तालुक्‍यासाठी एक कोटी ५४ लाख ६७ हजार ४५ रुपये, निफाडला ८५ लाख ८९ हजार ७००, दिंडोरीसाठी ४८ लाख ४९ हजार ५००, नाशिक तालुक्‍यासाठी आठ लाख २१ हजार ४३० रुपये नुकसानभरपाई प्राप्त झाली आहे.