Latest news | व्यसनाधीन वायरमनमुळे गाव अंधारात; कठोर कारवाईची मागणी

नामपूर (जि. नाशिक) : द्याने (ता. बागलाण) येथील विद्युत रोहित्रात बिघाड झाल्याने गाव अंधारात आहे. याबाबत महावितरण कंपनीच्या कर्मचाऱ्यांना जाब विचारण्यासाठी गेलेल्या शेतकरी संघटनेच्या पदाधिकाऱ्यांना संबंधित वीजकर्मचारी मद्यधुंद अवस्थेत आढळून आल्याने तीव्र संताप व्यक्त केला जात आहे. गाव अंधारात ठेवणाऱ्या संबंधित कामचुकार कर्मचाऱ्यांवर कठोर कारवाई करावी, अशी मागणी शेतकरी संघटनेचे तालुका कार्याध्यक्ष शैलेंद्र कापडणीस यांनी केली आहे. (Latest marathi news)

मोसम खोऱ्यात गेल्या काही दिवसांपासून महावितरण कंपनीच्या भोंगळ्या कारभाराने शेतकरी, सर्वसामान्य ग्राहक कमालीचे वैतागले आहेत. द्याने गावातील वीज रोहित्रामध्ये वारंवार बिघाड होत असल्याने नागरिकांना अनेक अडचणींचा सामना करावा लागत आहे. गावातील वीजपुरवठा बंद झाल्याने सार्वजनिक पाणीपुरवठा यंत्रणाही विस्कळीत झाली आहे. गावाची बत्ती गुल झाल्याने शेतकरी संघटनेच्या पदाधिकाऱ्यांनी संबंधित कर्मचाऱ्यांना जाब विचारला असता उडवाउडवीची उत्तरे दिल्याने ग्रामस्थांचा पारा अधिकच चढला.

त्यानंतर शुक्रवारी (ता. ८) रात्री शेतकरी संघटनेच्या पदाधिकाऱ्यांनी आसखेडा (ता. बागलाण) येथील वीज उपकेंद्र गाठले. या ठिकाणी शेतकरी संघटनेच्या पदाधिकाऱ्यांना संबंधित वीज कर्मचारी दारूच्या नशेत आढळून आले. त्यांना शेतकऱ्यांनी विचारलेल्या प्रश्‍नांची उत्तरेही देता येत नव्हती. दारूच्या नशेत वीज उपकेंद्राच्या आवारात दुर्दैवाने काही दुर्घटना घडली तर याला जबाबदार कोण, असा सवाल नागरिकांनी उपस्थित केला आहे. या वेळी शेतकरी संघटनेचे महेंद्र कापडणीस, द्याने सहकारी सोसायटीचे संचालक हितेंद्र कापडणीस, दिलीप कापडणीस उपस्थित होते.