आर्मीचा गणवेश घालून शिरला आर्टिलरी कॅम्पमध्ये, नाशकात एकाला अटक

नाशिकमध्ये विचित्र घटना समोर आली आहे. एक व्यक्ती आर्मीचा गणवेश घालून लष्कराच्या छावणीत घुसला. लष्करी अधिकाऱ्याच्या गणवेशात फिरणाऱ्या या तोतयाला अटक करण्यात आलंय. लष्करी हद्दीत फिरत असताना त्याच्या हालचालींवर संशय आला. (Fake Army Officer in Nashik)

त्यानंतर अधिकाऱ्यांनी त्याची चौकशी केली. यावेळी तो तोतया असल्याचं समोर आलं. देवळाली लष्कर कॅम्पच्या स्कूल ऑफ आर्टिलरीतील हा प्रकार आहे. (Nashik Army Camp)

गणेश बाळू पवार असं संबंधित व्यक्तीचं नाव आहे. तो याआधीही लष्कराच्या हद्दीत घुसला होता का, त्याचा छावणीत घुसण्याचा उद्देश काय होता, याबद्दल अद्याप खुलासा झालेला नाही.

गणेश बाळू पवार हा नाशिकच्या चांदवड तालुक्यातील हार्सोल गावचा रहिवासी आहे. गावातील तरुणांना लष्करात नोकरी लावण्याच्या बहाण्याने तो फसवणूकही करत होता. काल देखील अशाच स्वरुपाची फसवणूक करण्याच्या तो तयारीत होता.

लष्कराच्या जवानांनी त्यांच्या हालचाली आणि चालण्याची अदब ओळखली. यानंतर त्यांनी संबंधित व्यक्तीची चौकशी केली आणि हा खुलासा झाला.