अनुसूचित जातीतील कुटुंबांना ‘स्माइल’ योजनेतून अर्थसहाय्य

नाशिक : कोरोनामुळे (corona) अनुसूचित जातीच्या कुटुंबप्रमुखाचे निधन झाल्यास अशा कुटुंबांचे पुनर्वसन करण्यासाठी नवी दिल्‍लीतील एनएसएफडीसी यांच्या माध्यमातून योजना राबविली जात आहे. या योजनेंतर्गत महात्मा फुले मागासवर्ग विकास महामंडळामार्फत व्यवसायासाठी कर्ज उपलब्ध करून देण्यासाठी ‘स्माइल’ योजना (smile scheme) सुरू केली आहे. योजनेचा लाभ घेण्यासाठी संबंधित कुटुंबातील व्यक्तीने बुधवार (ता. ३०)पर्यंत अर्ज सादर करण्याचे आवाहन नाशिक महात्मा फुले मागासवर्ग विकास महामंडळाच्या जिल्हा व्यवस्थापकांनी प्रसिद्धीपत्रकाद्वारे केले आहे. (Financial-assistance-to-SC-families-through-Smile-scheme-nashik-marathi-news)

पुरावा आदी कागदपत्रे सादर करणे आवश्यक

प्रसिद्धीपत्रकात म्‍हटले आहे, की कोरोनामुळे १५ जूनपर्यंत मृत्यू झालेल्या अनुसूचित जातीतील कुटुंबांना या योजनेंतर्गत व्यवसाय करण्यासाठी कर्ज उपलब्‍ध होईल. एक ते पाच लाखांपर्यंत ६ टक्‍के व्‍याजदाराने सहा वर्षांकरिता कर्ज दिले जाईल. त्यासाठी अर्जदाराने महामंडळाच्या जिल्हा कार्यालयात अथवा https://forms.gle/7mG8CMecLknWGt6K7 या संकेतस्थळावर अर्ज सादर करावेत. अर्ज सादर करताना अर्जदाराने मृत व्यक्तीचे नाव व पत्ता, आधारकार्ड, उत्पन्नाचा दाखला (तीन लाखांपर्यंत), कोरोनामुळे मृत्‍यू झालेल्‍या व्यक्तीचा मृत्यू दाखला, रेशनकार्ड, वयाचा पुरावा आदी कागदपत्रे सादर करणे आवश्यक आहे.

असे आहेत निकष

अर्जदार अनुसूचित जातीतील असावा. अर्जदाराचे वार्षिक उत्पन्न तीन लाख रुपयांपर्यंत असावे. अर्जदार कोरोनामुळे मृत्यू झालेल्‍या कुटुंबप्रमुखाच्या कुटुंबातील सदस्य असावा. शिधापत्रिकेत नाव असणे बंधनकारक आहे. मृत व्यक्तीचे वय १८ ते ६० दरम्यान असावे. कोरोनामुळे मृत्यू झालेल्या संबंधित व्यक्तीचे महापालिका व पालिकेने दिलेले मृत्यू प्रमाणपत्र अथवा स्मशानभूमी प्राधिकरणाने दिलेली पावती किंवा एखाद्या गावात स्मशानभूमी नसल्यास गटविकास अधिकाऱ्याने दिलेले मृत्यू प्रमाणपत्र सादर करणे आवश्यक आहे.