Nashik News : जवान हेमंत देवरे यांच्यावर आज अंत्यसंस्कार

Nashik News : भारतीय सैन्यात पश्चिम बंगालमधील सिलिगुडी येथे हृदयविकाराने निधन झालेले जवान हेमंत यशवंत देवरे (वय ३५) यांचे पार्थिव मंगळवारी (ता.६) रात्री साडे नऊ वाजेच्या सुमाराला इंदिरानगरच्या नागरे मळा येथील वरदसाई या त्यांच्या निवासस्थानी आल्यानंतर कुटुंबीयांचा शोक अनावर झाला.

यावेळी उपस्थित शेकडो नागरिकांचे डोळेही पाणावले होते. (Funeral of soldier Hemant Deore today nashik news)

बुधवारी (ता.७) सकाळी १० वाजता पंचवटी अमरधाममध्ये त्यांच्यावर शासकीय इतमामात अंत्यसंस्कार होणार आहेत.

पोलिस दलात कार्यरत पत्नी वंदना, माजी सैनिक असलेले वडील यशवंत देवरे, आई शीला, बहिणी नीलम आणि रूपाली यांच्यासह सर्वच नातेवाईक आणि मित्र परिवाराला दु:ख आवरने मुश्कील झाले होते.

तर दुसरीकडे अवघ्या चार वर्षाचा त्यांचा मुलगा वरद आणि सात वर्षांची मुलगी लावण्या यांना मात्र फक्त आपल्या बाबांना काहीतरी झाले आहे, एवढेच कळत होते. त्यांची कावरी-बावरी नजर मात्र उपस्थितांना नि:शब्द करत होती.

पोलिस दलातील अनेक उच्चपदस्थ अधिकारी यावेळी उपस्थित होते. बुधवारी सकाळी ८ वाजता घराजवळ पारंपारिक आर्मी परेडद्वारे मानवंदना देऊन अंत्ययात्रेचा प्रारंभ होणार असल्याची माहिती सुभेदार मनोज जुन्नरकर यांनी दिली.