Nashik News : येवल्यात शासकीय रेशीम कोष खुली बाजारपेठ; भुजबळांचे प्रयत्न

येवला : शासनाच्या एकात्मिक व शास्वत वस्त्रोद्योग धोरण २०२३ -२८ अंतर्गत शहरात शासकीय रेशीम कोष बाजारपेठ निर्माण करण्यास शासनाची मंजुरी मिळाली आहे.

या बाजारपेठेमुळे येवल्यातील वस्त्रोउद्योगाला अधिक चालना मिळणार आहे. येवल्यातील रेशीम शेती आणि त्यावर आधारित पूरक उद्योगांचा विकास होईल. अन्न, नागरी पुरवठा व ग्राहक संरक्षण मंत्री छगन भुजबळ यांच्या विशेष प्रयत्नांतून ही मंजुरी मिळाली आहे. (Govt Silk Fund Open Market Bhujbal efforts Nashik News)

पैठणी उद्योगाला अधिक चालना मिळण्याच्या दृष्टीने मंत्री भुजबळ यांच्या माध्यमातून एरंडगाव येथे रेशीम पार्क उभा करण्यासाठी जागा राखीव केली आहे.

मंत्री भुजबळ यांच्या अध्यक्षतेखाली मे २०२३ मध्ये पुण्याच्या प्रादेशिक रेशीम कार्यालयाच्या सहाय्यक संचालिका डॉ. कविता देशपांडे, नाशिकचे रेशीम विकास अधिकारी इंगळे, सारंग सोरटे यांच्या उपस्थितीत नाशिकला बैठक झाली होती.

तीत मंत्री भुजबळ यांनी येवल्यात रेशीम पार्क उभा करण्याच्या दृष्टीने प्रकल्प अहवाल सादर करण्याच्या सूचना अधिकाऱ्यांना दिल्या होत्या.

येवला पैठणीचे माहेरघर म्हणून ओळखले जाते. स्थानिक कारागीर घरोघरी पैठणी तयार करतात. पैठणी तयार करण्यासाठी लागणारा रेशीमधागा परराज्यातून आयात करावा लागतो.

या उद्योगासाठी लागणाऱ्या कच्च्या मालाचे (रॉ सिल्क) उत्पादन स्थानिक पातळीवर व्हावे, यासाठी येवला येथे रेशीम पार्कची नितांत गरज आहे.

त्यानुसार राज्याच्या एकात्मिक व शास्वत वस्त्रोद्योग धोरण २०२३ -२८ अंतर्गत रेशीम शेती व त्यावर आधारित पूरक उद्योगांचा विकास करण्यासाठी तुती व टसर कोश, सूत खरेदी विक्रीसाठी खुली शासकीय बाजार व कच्च्या रेशीम एक्सचेंज स्थापन करण्याबाबत शासन निर्णय निर्गमित केला आहे.

त्यानुसार येथे शासकीय कोषाची खुली बाजारपेठ निर्माण करण्यास शासनाने मंजुरी दिली आहे. या निर्णयामुळे येवल्यातील वस्त्रोद्योगाला अधिक चालना मिळणार आहे. तुती व टसर रेशीम उत्पादन करणाऱ्या शेतकऱ्यांच्या शेतमालाला हक्काची बाजारपेठ निर्माण होऊन शेतकऱ्यांना अधिक फायदा होणार आहे.