Nashik | सार्वजनिक जीवनात आमदारांचं हे वागणं बरं नव्हं : पालकमंत्री भुसे देणार खोसकरांना सल्ला

नाशिक : आमदार हिरामण खोसकर यांनी इगतपुरीत कार्यकर्त्यांच्या वाढदिवसाचा केक कोयत्याने कापल्याची चर्चा सध्या सुरू आहे. याबाबत मला माहिती नाही, त्याबाबत माहिती घेईन, त्यात तथ्य असल्यास आमदार खोसकर यांना सार्वजनिक जीवनात असे वागणे योग्य नाही, याचीपण खासगीत निश्चितच माहिती देईन, अशा शब्दांत पालकमंत्री दादा भुसे यांनी आमदार खोसकर यांना चिमटा काढला.

पालकमंत्री श्री. भुसे यांनी आज बैठकीनंतर घेतलेल्या पत्रकार परिषदेत ते बोलत होते. श्री. भुसे म्हणाले, कोयत्याने केक कापण्याप्रकरणी मला माहिती नाही; पण कायदा सगळ्यांसाठी आहे. (Guardian Minister Bhuse will give advice to MLA Hiraman Khoskar Nashik News)

मतभेद नाहीत

आमदार सुहास कांदे नाराज असून, मुख्यमंत्र्यांच्या दौऱ्यात ते दिसले नाहीत याविषयी भुसे म्हणाले, की आमच्यात मतभेद नाहीत. जिल्ह्याच्या प्रश्नावर १५ मुद्यांचा आराखडा करून त्यावर काम सुरू आहे. येत्या काळात हे प्रश्न सुटलेले दिसतील. आमच्या सगळ्यांच्या एकत्रित प्रयत्नाचे ते फळ असेल.

राऊत यांचे समर्थक

खासदार संजय राऊत यांना जमीन मिळाल्यावर राज्यात सगळीकडेच फटाके फुटले, त्यामुळे एकट्या नांदगावला आनंदोत्सव झाला असे म्हणणे योग्य नाही. राऊत यांना मानणारे राज्यभर कार्यकर्ते आहेत. आदित्य ठाकरे हे राहुल गांधी यांच्या दौऱ्यात सहभागी होणार असल्याच्या प्रश्नांवर भुसे यांनी, ‘मी छोटा कार्यकर्ता असल्याने त्यावर भाष्य करणार नाही’, असे सांगत या विषयावर प्रतिक्रिया न देता मौन पाळले.