हर घर तिरंगा : शासकीय कार्यालयावर यंदा 75 फुटाचा तिरंगा

नाशिक : 'आजादी का अमृतमहोत्सवां'तर्गत केंद्र सरकारने 'हर घर तिरंगा'अभियान सुरू केले असून याअंतर्गत नाशिक जिल्हाधिकारी कार्यालयासह अन्य पाच शासकीय कार्यालयांवर ७५ फूट उंचीवरून तिरंगा फडकवला जाणार आहे अशी माहिती उपजिल्हाधिकारी नितीन मुंडावरे यांनी दिली आहे. (Har Ghar Tiranga 75 feet indian flag on government office this year nashik latest marathi news)

जिल्हाधिकारी गंगाथरण. डी. यांनी जिल्ह्यातील पाच शासकीय कार्यालयांत ७५ फूट उंच ध्वजस्तंभ उभारून तिरंगा फडकवण्याचा निर्णय घेतला आहे. त्यानुसार नाशिक जिल्हाधिकारी कार्यालयात त्याचे काम सुरू असून हे १० आॅगस्टच्या आत पूर्ण केले जाणार आहे.

जिल्हाधिकारी कार्यालयाबरोबरच कळवण तहसील कार्यालय, निफाड येथे नवीन प्रशासकीय इमारत, येवला येथील प्रशासकीय संकुल आणि मालेगाव येथे पंचायत समिती कार्यालयात हा ७५ फूट उंच ध्वजस्तंभ उभारण्यात येणार असून तेथेही युद्धपातळीवर काम सुरू झाले आहे.

ध्वजस्तंभाच्या शेजारी संविधान स्तंभही उभारला जाणार आहे. ७५ फूट उंचावरून फडकणारा तिरंगा हा दिवस-रात्र कायमस्वरूपी फडकणार आहे.