आज हरितालिका पूजन; आदिशक्‍तीच्या पूजनातून तत्त्वांची जपवणूक

नाशिक : भाद्रपद तृतीया म्‍हणजे हरितालिका पूजन. या दिवशी महिला व कुमारिका हे व्रत करतात. शंकर पार्वती संवादात हरितालिका कथा सांगितली आहे. श्रावण महिन्यापासून सुरू झालेला चातुर्मासातील दूसरा महिना म्‍हणजे भाद्रपद, श्रावण संपताच भाद्रपदातील लगबग म्‍हणजेच हरितालिका. (Hartalika Puja today Ganeshotsav 2022 Nashik Latest Marathi News)

गणपती आगमनाची चाहुल तसेच गौरी पूजन हे अवघे भाद्रपदाला लागूनच येणारे सण. गणेश चतुर्थीच्या अगोदर म्‍हणजेच तृतीयेला हरितालिकेची पूजा केली जाते. शिवपार्वती ही जगताची माता- पिता म्‍हणून पूजन केले जाते.

स्‍त्री व पुरुष तत्त्व यातून विश्‍वाची निर्मिती झाली म्‍हणून या तत्त्वांचे पूजन तसेच आदिशक्‍तीच्या पूजनातून प्रार्थना केली जाते. दरम्यान, सोमवारी (ता. २९) मुख्य बाजारपेठेत महिला वर्गाची पूजा साहित्‍य खरेदी करण्यासाठी गर्दी झाली होती. पत्री साहित्य ३० रुपये, सौभाग्‍यलेणी साहित्‍य १० रुपये, पाच फळे ३० रुपये, असा भाव होता.

हरितालिका व्रत कसे करावे?

सकाळी सुचिरभुत होऊन वाळूच्या शिवलिंगाची स्‍थापना करून त्‍याची पूजा केली जाते. विविध प्रकारची बहुगुणी पत्री, बेल, सौभाग्‍यलेणी, वस्‍त्र अर्पण करून पूजा, आरती, कहाणी केली जाते. महिला दिवसभर निर्जळी उपवास करतात. रात्री महिला, सखींसोबत जागरण करतात. दुसऱ्या दिवशी नैवेद्य दाखवून उपवास सोडला जातो.

पार्वती वडिलांवर रूसली असता अलि म्‍हणजेच सखीने पार्वतीला बरोबर नेले म्‍हणजेच ‘हिरता’ व अरण्यात आणले. तिथे पार्वतीने शिवलिंगाची पूजा केली, उपवास केला. या व्रताने शिव पार्वतीस प्रसन्न झाले व पत्‍नी म्‍हणून पार्वतीचा स्वीकार केला, अशी आख्यायिका आहे. यामुळे सुहासिनी आपल्‍या सुखी संसारासाठी हे व्रत करतात. तसेच कुमारिका इच्छित पती प्राप्त होण्यासाठी व्रत करतात.