मालेगाव- गुढीपाडव्याच्या मुहूर्तावर रविवारी (ता. ३०) सकल हिंदू समाजातर्फे येथे विराट हिंदू संत संमेलन होणार आहे. संमेलनास माजी खासदार साध्वी प्रज्ञासिंह यांना हिंदू वीर पुरस्काराने गौरविले जाणार आहे. .नागपूर दंगलीनंतर पोलिस व प्रशासनाने कायदा व सुव्यवस्थेचे कारण दाखवत परवानगी नाकारल्याने सकल हिंदू समाजातर्फे सहसंपर्कप्रमुख राहुल बच्छाव यांनी मुंबई उच्च न्यायालयात धाव घेतली होती. न्यायालयाने अटी व शर्तींना अधीन राहून संमेलनास परवानगी दिली आहे. आमच्या लढ्याला यश आले. सटाणा रस्त्यावरील यशश्री कंपाउंडमध्ये दुपारी एक ते सायंकाळी पाच या वेळेत संमेलन होणार असल्याची माहिती मच्छिंद्र शिर्के यांनी येथे पत्रकार परिषदेत दिली..श्री. शिर्के म्हणाले, की उच्च न्यायालयाने येथील विराट हिंदू संत संमेलनास काही अटींवर परवानगी दिली आहे. अटी-शर्तींचे पालन सकल हिंदू समाजातर्फे करण्यात येईल. न्यायालयात दाखल करण्यात आलेल्या याचिकेवर शुक्रवारी तीन वेळा सुनावणी झाली. देशात संविधानाने प्रत्येकाला स्वातंत्र्य दिले आहे. .सकल हिंदू समाज संविधानिक मार्गाने गेल्याने हा कार्यक्रम होईल. शहर व परिसरात महिन्यापासून कार्यक्रमासंदर्भात प्रचार सुरू आहे. कार्यक्रमास पाच हजार भाविक येण्याची शक्यता आहे. शहरवासीयांनी उपस्थित रहाण्याचे आवाहन श्री. शिर्के यांनी केले. कैलास शर्मा, प्रमोद पाठक, जगदीश गोऱ्हे, क्रांती पाटील, नितीन पोफळे उपस्थित होते..हे प्रमुख वक्ते येणारप्रमुख वक्ते म्हणून वारकरी संप्रदायातील संग्रामबापू भंडारे, अखिल भारतीय संत समितीचे महामंत्री स्वामी श्री भारतानंद सरस्वती महाराज, पुणे येथील मिलिंद एकबोटे, राष्ट्रसंत मुनी नीलेशचंद्र महाराज उपस्थित राहणार आहेत. प्रमुख वक्ते प्रक्षोभण व दोन समाजांत तेढ निर्माण होईल, असे कोणतेही भाषण करणार नाहीत. यासंदर्भात आयोजकांना अप्पर पोलिस अधीक्षक तेगबीरसिंह संधू यांना प्रतिज्ञापत्र द्यावे लागणार आहे. उच्च न्यायालयाच्या अटी व शर्तींचे काटेकोर पालन करावे लागेल..साध्वी प्रज्ञासिंहांबाबत उत्सुकता माजी खासदार साध्वी प्रज्ञासिंह ठाकूर या भोपाळ येथून विमानाने शिर्डी येथे येणार आहेत. तेथून कारने त्या मालेगावी येतील. त्यांना सकल हिंदू समाजातर्फे हिंदू वीर पुरस्काराने सन्मानित केले जाणार आहे. साध्वी प्रज्ञासिंह या मालेगाव बॉम्बस्फोटातील मुख्य आरोपी आहेत. रमजान ईदच्या पूर्वसंध्येला होणाऱ्या या कार्यक्रमाला व साध्वी प्रज्ञासिंह यांच्या दौऱ्याला येथील समाजवादी पक्षाने विरोध दर्शविला होता. साध्वी प्रज्ञासिंह या केवळ सकल हिंदू समाज व आयोजकांचे आभार मानणार असून, इतर भाषण करणार नसल्याचे समजते..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
