Summer Fruit: कोकणातील तोडगोळे मालेगावात दाखल! प्रथमच फळ विक्रीसाठी आल्याने बघणाऱ्यांसह खरेदीदारांची गर्दी

Summer Fruit : शहरात तापमानाने पुन्हा डोके वर काढले आहे. तापमान वाढल्याने नागरिकांची शीतपेयांच्या गाड्यांवर झुंबड उडाली आहे. अशातच वाढत्या तापमानाच्या पाश्‍र्वभूमीवर कोकणातील तोडगोळे (आईस ॲपल) हे फळ विक्रीसाठी शहरात दाखल झाले आहे.

तोडगोळे हे फळ शरीराला थंड असल्याने मोठे लाभदायक आहे. शहरात हे फळ प्रथमच विक्रीसाठी आल्याने बघ्यांची व खरेदी करणाऱ्यांची गर्दी होत आहे. (ice apple from Konkan entered Malegaon Crowd of buyers summer fruit nashik news)

शहराचा पाऱ्याने चाळिशी ओलांडली आहे. वाढत्या तापमानामुळे रस्ते निर्मनुष्य झाले आहेत. येथील शासकीय विश्रामगृहाजवळील भिंतीलगत तोडगोळे विक्रीसाठी आले आहेत. गेल्या दोन दिवसापासून तोडगोळे घेण्यासाठी नागरिकांनी गर्दी केली आहे.

शहरात तोडगोळे हे फळ नवीन असल्याने नागरिकांना त्याची भुरळ पडली आहे. तोडगोळे १२० रुपये डझनप्रमाणे विकले जात आहेत. प्रामुख्याने तोडगोळ्यांचे अलिबाग, रत्नागिरी, पनवेल, पालघर, गोवा या कोकण भागात उत्पादन घेतले जाते.

कोकण पट्ट्यातील हे फळ एप्रिल महिन्यापासून बाजारात येण्यास सुरवात होते. जूनपर्यंत हे फळ बाजारात विक्रीसाठी दिसतात. प्रामुख्याने या फळांची विक्री मुंबई, केरळ येथे होते. शहरात विक्री होणाऱ्या तोडगोळ्यांना चांगल्या प्रकारे मागणी असून १० रुपये प्रतिनग प्रमाणे विकले जात आहेत.

तोडगोळे हे फळ मालेगावकरांना नवीन असल्याने व्यावसायिकांना ये-जा करणाऱ्या नागरिक विचारपूस करत फळाचे फायदे काय? व कोणत्या आजारासाठी या फळाचा उपयोग केला जातो. अशी विचारणा नागरिकांकडून व्यावसायिकांना केली जात आहे.

हेही वाचा : Credit Card फसवणूक....काय घ्याल काळजी?

तोडगोळे हे मधुमेहींसाठी गुणकारी

तोडगोळ्यांमध्ये कमी प्रमाणात कॅलरी असते. या फळात विटॅमिन ए, सी यासह लोह, झिंक, कॅल्शिअम, फॉस्फरस आदी घटक आढळतात. मधुमेह असणाऱ्या रुग्णांना हे फळ फलदायी ठरते. तसेच उन्हाळ्यात तोडगोळ्यांचे सेवन केल्यामुळे पाण्याची कमतरता भरून निघते. शरीरातील तापमान नियंत्रित राहते. मुतखडा रुग्णांसाठी फायदेशीर असल्याचे अमीर खान यांनी सांगितले.

"तोडगोळ्यांची चवच इतर फळांपेक्षा वेगळी आहे. एका वेळेस खाल्ल्यास परत खाण्याची इच्छा होते. शहरातील नागरिकांनी फळांचा आस्वाद घ्यावा." - किशोर धात्रक

"गेल्या पाच वर्षापासून सीझनमध्ये आम्ही नाशिक शहरात तोडगोळे विकतो. मालेगावचे तापमान जास्त असल्याने या वर्षी थेट कोकणातून माल भरुन आणला आहे. महिनाभर मालेगावकरांना तोडगोळे विक्रीसाठी शहरात दिसणार आहेत."- अफझल पठाण, तोडगोळे विक्रेता