बेदाणा तयार करणे झाले महाग; उत्पादन साहित्याच्या दरात मोठी वाढ

पिंपळगाव बसवंत (जि. नाशिक) : द्राक्षाबरोबरच बेदाणा (Raisins) निर्मितीचा हंगामाने निफाड तालुक्यात वेग घेतला आहे. हिरवा पाचू अर्थात बेदाणा तयार करण्यासाठी लागणाऱ्या साहित्याच्या किंमती तीस टक्क्यांनी वाढल्या आहेत. डिंपींग आॅईल, सल्फर(sulphur), बॉक्स अशा साहित्याच्या दरात मोठी वाढ झाली आहे. त्यामुळे उत्पादकांच्या अडचणीत वाढ होऊन बेदाणा तयार करणे महाग झाले आहे.

निफाड तालुक्यात पन्नास हजार एकरावर द्राक्षबागाचे क्षेत्र विस्तारले आहे. द्राक्षांची भिस्त उपउत्पादन असलेल्या बेदाण्यावर मोठ्या प्रमाणात असते. उगांव, कसबे सुकेणे, पिंपळगाव बसवंत परिसरात मोठ्या प्रमाणात बेदाणा निर्मितीचे शेड उभारण्यात आले आहेत. निफाड तालुक्यात यंदाही दहा हजार टन बेदाणा निर्मिती होण्याची शक्यता आहे. सध्या द्राक्षाला सरासरी ३० रूपये प्रतिकिलो दर मिळत असल्याने शेतकरी मोठ्या प्रमाणात बेदाणा निर्मितीकडे वळले आहेत.

गेल्या पाच वर्षात बेदाण्याने जगातील बाजारपेठ कवेत घेतली आहे. अफगाणच्या (Afganistan) बेदाण्याला नाशिकचा बेदाणा टक्कर देऊ लागला आहे. मलेशिया, सिंगापूर, सौदी अरेबिया, श्रीलंका या देशात दरवर्षी किमान पाच हजार टन नाशिकचा पिवळा बेदाणा पोहचत आहे. सध्या सव्वाशे रूपये प्रतीकिलो असा दर पिंपळगाव बाजार समितीत मिळतो आहे. त्यामुळे शेतकरी आधुनिक तंत्रज्ञानाचा वापर करून दर्जेदार बेदाणा तयार करत आहे. सुकामेवा, टुथपेस्ट, आयुर्वेदीक औषधे आदींसाठी बेदाण्याचा वापर होतो. बेदाण्याच्या निर्मितीसाठी डिंपींग आॅईल, सल्फर ची गरज असते. यास बॉक्स, प्लास्टीक याचे दरही वाढल्याने बेदाण्या निर्मितीला महागाईच्या झळा बसत आहे.

जुने दर-सध्याचे दर

डिंपीग आॅईल: 3200-4800 रूपये

सल्फर: 1900-3100 रूपये

प्लास्टीक: 115-175 रूपये किलो

"बेदाण्याचा उत्पादनखर्च वाढला आहे. मजुरीचे दरही वाढले आहेत. बेदाणा उत्पादन करणे मुश्‍कील झाले आहे. शासनाने दर कमी करून साहित्य उपलब्ध करून देण्याची गरज आहे."

- रमेश जाधव (बेदाणा उत्पादक)