त्रुटी आढळल्यास माहिती मागविण्यात येईल

नाशिक : कठडा येथील महापालिकेच्या डॉ. झाकिर हुसेन रुग्णालयात घडलेल्या दुर्घटनेत चौकशीअंती ठेकेदारांना दंड करण्यात आला आहे. त्यामुळे या प्रकरणाची पारदर्शकपणे चौकशी करून चौकशीत त्रुटी आढळून आल्यास पुन्हा सविस्तर माहिती मागविण्यात येईल, अशी माहिती राज्याचे आरोग्यमंत्री राजेश टोपे यांनी दिली.

महापालिकेच्या डॉ. झाकिर हुसेन रुग्णालयात २१ एप्रिलला टाक्यांमध्ये ऑक्सिजन भरताना गळती झाली. त्यात ऑक्सिजन पुरवठा खंडित झाल्याने २२ रुग्णांचा नाहक बळी गेली होता. घटनेची चौकशी करण्यासाठी विभागीय आयुक्तांच्या अध्यक्षतेखाली समिती नियुक्त करण्यात आली होती. पंधरा दिवसात समितीने अहवाल सादर केला. त्यानंतर महापालिकेने तायो निप्पॉन व जाधव एंटरप्राइजेस कंपनीवर हलगर्जीपणा केल्याचा ठपका ठेवला. ऑक्सिजन भरताना कंपनीचे अधिकारी जागेवर राहणे बंधनकारक होते,

तसेच दुर्घटना घडल्यानंतर पंधरा दिवसांनी कंपनीच्या अधिकाऱ्यांनी संपर्क साधल्याने बावीस लाख रुपये दंडात्मक कारवाई करण्यात आली. दंडात्मक रक्कम अद्याप वसूल झाली नाही. या पार्श्‍वभूमीवर मंगळवारी (ता. १९) आरोग्यमंत्री टोपे यांनी माध्यमांनी विचारलेल्या प्रश्‍नावर उत्तर देताना महापालिका, तसेच विभागीय आयुक्तांच्या समितीकडून पुन्हा चौकशी अहवाल मागवून तपासणी करू, तपासणी पारदर्शक झाली नसल्यास संबंधितांवर कारवाईचे आश्‍वासन दिले. दरम्यान पहिल्या व दुसऱ्या लाटेप्रमाणेच तिसऱ्या लाटेतही मोठ्या प्रमाणात विनानिविदा औषधे खरेदी केले जात असल्याने महापालिकेला औषधे खरेदीचे नियम पाळण्याचा सल्ला देताना अनियमितता आढळून आल्यास चौकशीला सामोरे जावे लागेल, असा इशारा श्री. टोपे यांनी दिला.