Nashik : YCMOU विद्यापीठात बिबट्याचा वावर

नाशिक : यशवंतराव चव्हाण महाराष्ट्र मुक्त विद्यापीठात बिबट्याचा मुक्त वावर असून, रविवारी (ता.४) रात्री बिबट्याने श्‍वानाच्या पिल्लावर झडप घेत त्यास फस्त केले. यानंतर वनविभागास या घटनेची तत्काळ माहिती देण्यात आली. मुक्त विद्यापीठातील बिबट्याच्या वावरामुळे येथील परिसरात दहशतीचे वातावरण झाले आहे. (Leopard in YCMOU University Nashik Latest News)

शहरासह लगतच्या गावांमध्ये बिबट्यांचा मोठ्या प्रमाणात वावर वाढला आहे. रविवारी (ता. ४) रात्री पावणेदहाला यशवंतराव चव्हाण महाराष्ट्र मुक्त विद्यापीठातील कुलगुरू निवासस्थानाजवळ असलेल्या श्‍वानाच्या पिल्लावर बिबट्याने झडप मारत त्यास ओढून नेले.

या सर्व प्रकार येथील सीसीटीव्ही फुटेजमध्ये कैद झाला. घटनेची माहिती तत्काळ वनविभागास देण्यात आली. त्यानंतर या ठिकाणी असलेल्या सर्वांना सतर्क राहण्यास सांगण्यात आले आहे. यापूर्वीदेखील मुक्त विद्यापीठात दोन ते तीन वेळा येथील स्थानिकांना बिबट्याचे दर्शन झाले आहे.

लहवित येथे बिबट्या जेरबंद

लहवित येथील पाळदे यांच्या शेतात लावलेल्या पिंजऱ्यामध्ये पहाटे एक बिबट्या (मादी) जेरबंद झाली आहे. लहवित परिसरातील बिबट्याच्या मुक्त संचारामुळे या ठिकाणी स्थानिकांच्या मागणीनुसार राजाराम पाळदे यांच्या शेतात पिंजरा लावला होता.

या पिंजऱ्यात सोमवारी (ता. ५) पहाटे बिबट्या जेरबंद झाल्याची माहिती वनविभागाच्या अधिकाऱ्यांना देण्यात आली. त्यानंतर वनविभागाने सदर ठिकाणी जात पाहणी केली. हा बिबट्या सुमारे ३ ते ४ वर्षाचा असून, त्यास वनविभागाने तत्काळ ताब्यात घेत सुरक्षित ठिकाणी नेले.