किल्पआर्ट वापरणे
-------------
मालेगावला २९ दुचाकी जप्त; नऊ गुन्हे उघडकीस
सकाळ वृत्तसेवा
मालेगाव, ता. ६ : स्थानिक गुन्हे शाखेच्या पथकाने शहरातील राजानगर अदिब रोड परिसरात छापा घालून चोरीच्या २९ दुचाकी जप्त केल्या. या कारवाईतून दुचाकी चोरीचे नऊ गुन्हे उघडकीस आले आहेत. या प्रकरणी तिघांविरुद्ध गुन्हा दाखल झाला आहे.
शहरातील राजानगर अबिद रोड परिसरात काही संशयित चोरीच्या मोटारसायकली कमी दरात विक्री करण्यासाठी येणार असल्याची खात्रीशीर माहिती स्थानिक गुन्हे शाखेच्या अधिकाऱ्यांना मिळाली होती. त्यानुसार पथकाने छापा घातला. युसूफ अली अहमद अली (रा. जाफरनगर) व आदिल शहजाद अब्दुल रौफ (रा. राजानगर, अबिद रोड) यांना ताब्यात घेतले.
पोलिसांनी युसूफ अलीकडे विचारपूस केल्यानंतर त्याने त्याचा साथीदार पापा (रा. जाफरनगर, पूर्ण नाव माहित नाही) अशा दोघांनी टिंगरी, नांदगाव, मेहुणबारे, पवारवाडी, चांदवड, नाशिक शहर, धुळे तसेच मालेगाव शहरातून विविध ठिकाणांहून दुचाकी चोरी केल्याची कबुली दिली. चोरी केलेल्या दुचाकी त्यांचा मित्र आदिल शहजाद याला विक्री करण्यासाठी दिल्याची कबुली त्यांनी दिली. दोघांच्या ताब्यातून १५ लाख १० हजार किमतीच्या २९ दुचाकी जप्त करण्यात आल्या आहेत.
युसूफ अली सराईत गुन्हेगार असून त्याच्यावर यापूर्वी शहरातील विविध पोलिस ठाण्यात दुचाकी चोरीचे गुन्हे दाखल आहेत. फरार असलेल्या पापाचा पोलिस पथक शोध घेत आहे. जप्त करण्यात आलेल्या चोरीच्या दुचाकी मालेगाव तालुका पोलिस ठाण्यात ठेवण्यात आल्या आहेत.