नाशिक : एमडी ड्रग्ज (मॅफेड्रॉन) विक्रीच्या तयारीतील तीन संशयितांना पोलिसांनी रंगेहाथ पकडले. तसेच, त्यांना ड्रग्जपुरवठा करणाऱ्या संशयितालाही गजाआड केले आहे. संशयितांकडून तीन लाख रुपये किमतीच्या ६१.५ ग्रॅम एमडी ड्रग्जसह एकूण तीन लाख २२ हजार ५०० रुपयांचा मुद्देमाल जप्त करण्यात आला. चौघा संशयितांना न्यायालयाने सोमवार (ता. ९)पर्यंत पोलिस कोठडी सुनावली आहे. सातत्याने कारवाई सुरू असली, तरी ड्रग्जमाफियांकडून विक्रीचे प्रयत्न थांबविण्याचे आव्हान पोलिस यंत्रणेपुढे आजही कायम आहे.