नाशिक विमानतळ येणार हज टर्मिनलच्या यादीत

नाशिक : हज यात्रेसाठी उत्तर महाराष्ट्राचे मुख्य केंद्र म्हणून नाशिकला मिनी हाऊस व्हावे तसेच मुंबईऐवजी नाशिक येथून हज येथे जाणाऱ्या भाविकांना विमानसेवा उपलब्ध व्हावी, नाशिक विमानतळाचा हज टर्मिनलच्या यादीत समावेश व्हावा यासाठी सुरु असलेल्या खासदार हेमंत गोडसे यांच्या प्रयत्नांना यश आले आहे. याबाबत राज्याचे अल्पसंख्याक मंत्री यांनी नवाब मलिक यांनी केंद्रीय अल्पसंख्यांक व्यवहारमंत्री मुक्तार नक्वी यांच्याकडे शिफारस केली आहे.

भाविकांची गैरसोय टळणार

खासदार गोडसे यांनी आज दिल्लीत नक्वी यांची भेट घेत उत्तर महाराष्ट्रातील हज यात्रेकरुंसाठी नाशिक विमानतळाचा समावेश करण्याची मागणी केली. उत्तर महाराष्ट्रातील नाशिक, धुळे, जळगाव, नगर, नंदुरबार या जिल्ह्यातून दरवर्षी १२ ते १५ हजार मुस्लिम हज यात्रेला जातात. गेल्यावर्षी राज्यातून हज यात्रेसाठी सुमारे पंधरा हजार भाविक गेले होते. यापैकी तीन हजार भाविक एकट्या उत्तर महाराष्ट्रातून गेले. शासनाने त्यासाठी ऑनलाईन पद्धत सुरु केली असली तरी कागदपत्रांची पूर्तता करण्यासाठी भाविकांना मुंबईला तीन ते चार चकरा माराव्या लागतात. कागदोपत्रांच्या पूर्तेतेनंतरच भाविकांना मुंबई विमानतळावरुन हजयात्रेला जावे लागते. यात पैसे आणि वेळेचा अपव्यय होत असल्याने भाविकांची गैरसोय टाळण्यासाठी नाशिकला मिनी हज हाऊस व्हावे आणि विमानतळाचा हज टर्मिनलच्या यादीत समावेश व्हावा, यासाठी खासदार गोडसे यांचा राज्य आणि केंद्राकडे पाठपुरावा सुरु आहे.