Nashik Ashok Kataria Fraud Case: अशोक कटारिया यांचा ‘अटकपूर्व’ फेटाळला! अडचणीत वाढ; हायकोर्टात जाण्याची शक्यता

Nashik Ashok Kataria Fraud Case : उपनगर पोलिस ठाण्यात ९९ लाखांच्या फसवणुकीसह एमपीआयडी अंतर्गत दाखल गुन्ह्यात बांधकाम व्यावसायिक अशोक कटारिया यांच्या अडचणीत आणखी भर पडली आहे. कटारिया यांचा अटकपूर्व जामीन अर्ज जिल्हा व सत्र न्यायालयाने फेटाळून लावला आहे. यामुळे उपनगर पोलिसांकडून कटारिया यांच्या अटकेची शक्यता असून, दुसरीकडे कटारिया यांनी अटकपूर्व जामीनासाठी मुंबई उच्च न्यायालयात धाव घेण्याचीही शक्यता आहे. (Nashik Ashok Kataria pre arrest bail rejected)

मनोज लेखराम हरियानी यांच्या फिर्यादीनुसार, कारडा कन्स्ट्रक्शनचे नरेश कारडा, अशोका ग्रुपचे अशोक कटारिया, अनुप कटारिया, सतीश पारख (सर्व रा नाशिक) यांच्याविरोधात उपनगर पोलिस ठाण्यामध्ये ९९ लाख रुपयांच्या फसवणुकीसह एमपीआयडी अंतर्गत गुन्हा दाखल करण्यात आलेला आहे.

याप्रकरणात कटारिया यांनी अटकपूर्व जामिनासाठी जिल्हा व सत्र न्यायालयात धाव घेतली होती. त्यावर सोमवारी (ता. २९) अंतिम सुनावणी होऊन, त्यांचा जामीन अर्ज न्यायालयाने फेटाळला आहे. यामुळे कटारिया यांच्यासमोरील अडचणी वाढल्या आहेत. तर, याच गुन्ह्यात नरेश कारडा यांचा अटकपूर्व जामीन अर्ज यापूर्वीच न्यायालयाने फेटाळला आहे. (Latest Marathi News)

यामुळे कटारिया यांच्या अटकेची शक्यता आहे. मात्र त्यांनी मुंबई उच्च न्यायालयात अटकपूर्व जामीन मिळविण्यासाठी धाव घेतल्याची शक्यता आहे. याबाबत अद्यापपर्यंत पोलीसांकडे माहिती नसल्याचे समजते. मात्र कटारिया यांच्या अडचणी वाढल्याचे आता बोलले जात आहे.

‘या’ गुन्ह्यातही धाव

दरम्यान, मनोहर कारडा यांच्या आत्महत्त्येप्रकरणी दाखल गुन्ह्यातही अशोक कटारिया यांचा संशयितांमध्ये समावेश आहे. या गुन्ह्यातही कटारिया यांनी अटकपूर्व जामीनासाठी जिल्हा व सत्र न्यायालयात अर्ज दाखल केला आहे. त्यात कटारिया यांना दिलासा मिळतो का, याकडे लक्ष आहे.