नाशिक शहर बससेवेत दरवाढ... | CITILINK

नाशिक : महापालिकेतर्फे सुरू करण्यात आलेल्या शहर बससेवेतील तोटा लक्षात घेता सिटीलिंक (CITILINK) कंपनीने पाच टक्के प्रवासी भाडेवाढीचा प्रस्ताव प्रादेशिक परिवहन प्राधिकरणाला सादर केला आहे. प्राधिकरणाच्या मान्यतेनंतर भाडेवाढ लागू होईल. सहा महिन्यातच भाडेवाढीचा प्रस्ताव सादर केल्याने नागरिकांमध्ये नाराजी आहे.

महापालिकेतर्फे ८ जुलै पासून शहर बससेवा सुरू करण्यात आली. महापालिकेने थेट बससेवा सुरू करण्याऐवजी ऑपरेटर्स नियुक्त करण्यात आले. चालक व वाहकांचे आऊटसोर्सिंग करण्यात आले. नाशिक महानगर परिवहन समिती कंपनीची स्थापना करण्यात आली. सध्या ४२ मार्गांवर १४८ बस चालविल्या जात आहेत. एका बसमधून प्रतिकिलोमीटरला ४५ रुपये उत्पन्न मिळते. वास्तविक महापालिकेने ७२ रुपये उत्पन्न अपेक्षित आहे. साधारण २६ रुपये किलोमीटरला तोटा येतो. ८ जुलै २०२१ ते ३१ मार्च २०२२ दरम्यान २७ कोटी रुपयांचा तोटा होण्याची शक्यता आहे. तोटा कमी करण्यासाठी फायद्याच्या मार्गावर बस वाढविण्याबरोबरच जाहिरातीच्या माध्यमातून उत्पन्न वाढविण्याचा निर्णय घेण्यात आला आहे. आता पुढील टप्प्यात सिटीलिंक कंपनीने ५ टक्के भाडेवाढीचा प्रस्ताव सादर केला आहे. प्रादेशिक परिवहन प्राधिकरणाने मंजुरी दिल्यास दोन ते तीन रुपये वाढ होणार आहे.

''सिटीलिंक कंपनीने दरवर्षी पाच टक्के भाडेवाढीचे धोरण स्वीकारले आहे. गेल्या काही महिन्यांत इंधनाचे दर सातत्याने वाढत असल्याने प्रवासी भाडेदरात वाढ करण्याचा निर्णय घेण्यात आला आहे. मात्र, परिवहन प्राधिकरणाच्या मंजुरीनंतरच अंमलबजावणी होईल.'' - कैलास जाधव, आयुक्त

प्रस्तावित प्रवासी दरवाढ (रुपयांत)

किलोमिटर सध्याचे दर प्रस्तावित दर
प्रौढ बालक प्रौढ बालक
०-२ १० ५ १० ५
२-४ १५ १० १६ १०
४-६ २० १० २१ ११
६-८ २५ १५ २७ १५
१०-१८ ३० १५ ३२ १६
१८-२२ ३५ २० ३७ २१
२२-२६ ४० २० ४२ २१
२६-३० ४५ २५ ४८ २५
३०-३८ ५० २५ ५३ २७
३८-४२ ५५ ३० ५८ ३०
४२-४६ ६० ३० ६३ ३२