Nashik Crime News : सोशल मीडियावर अश्लिल चित्रफिती; सायबर पोलिसात गुन्हा

Nashik Crime News : समाज माध्यमांवर आक्षेपार्ह, अश्लिल मजकूर व चित्रफिती अपलोड करून त्या प्रसारित करणे कायदेशीर गुन्हा आहे. असे असतानाही समाज माध्यमांच्या विविध सोशल मीडियावर लहान मुलांचे अश्लिल व्हिडिओंसह अनेक प्रकारच्या अश्लिल चित्रफिती व्हायरल करणार्या सुमारे ३३ प्रोफाईल धारकांविरोधात नाशिक सायबर पोलिसात गुन्हा दाखल करण्यात आला आहे. ()

शाळा, महाविद्यालयीन मुलांच्या हातात स्मार्टफोन्स पोहोचले आहेत. स्मार्ट फोनमुळे बहुतांशी विषयांची माहिती क्षणात उपलब्ध होत आहे. यावरून अनेक विषयांची अभ्यासू माहिती जशी सहज मिळते, तशीच गैरमार्गी माहितीही मिळते. त्यामुळे बहुतांशी तरुणाई ही जिज्ञासावृत्तीतून विषयांची माहिती घेण्याऐवजी गैरप्रवृत्तीच्या माहिती मिळविण्यासाठीच स्मार्ट फोनचा वापर करताना आढळून येते.

परिणामी, सोशल मीडियावरील विविध साईटस्‌वर अश्लिल व आक्षेपार्ह मजकूर व्हायरल होण्याचे प्रमाण वाढलेले आहे. असा मजकूर समाज माध्यमांवर व्हायरल करणे कायदेशीर गुन्हा असतानाही असा मजकूर, चित्रफिती मोठ्याप्रमाणात व्हायरल होत असतात.

नाशिक सायबर पोलीस ठाण्याचे सहायक पोलीस निरीक्षक प्रतिक पाटील यांनी दिलेल्या फिर्यादीनुसार, सोशल मीडियाच्या फेसबुक, इंन्स्टाग्राम, व्हॉटसॲप, गुगल, स्नॅपचॅट यासारख्या विविध समाज माध्यमावंरील ३३ प्रोफाईल धारकांनी चाईल्ड प्रोनोग्राफी, बलात्कार, सामुहिक बलात्कार, आक्षेपार्ह / अश्लिल असा मजकूर व चित्रफिती व्हायरल केला आहे.

यासंदर्भात तपास करीत सायबर पोलिसांनी गोपनीयरित्या या प्रोफाईलधारकांची माहिती पुराव्यांसह प्राप्त केली आहे. सदरचा प्रकार जानेवारी २०२१ ते जून २०२१ या दरम्यानचा आहे. याप्रकरणी नाशिक सायबर पोलिसात माहिती तंत्रज्ञान अधिनियम २०००चे कलम ६७(ब) अन्वये गुन्हा दाखल करण्यात आला आहे. वरिष्ठ पोलीस निरीक्षक रियाज शेख हे तपास करीत आहेत.