Nashik Crime News : प्राणघातक हल्ल्यातील दोघांना मालेगावातून अटक; गुंडाविरोधी पथकाची कामगिरी

नाशिक : गेल्या महिन्यात गांधीनगरमध्ये जुन्या वादातून एकाला शिवीगाळ करीत धारदार हत्याराने वार करीत जीवे ठार मारण्याचा प्रयत्न केला होता. मात्र गुन्हा दाखल झाल्यापासून दोघे संशयित पसार असताना, शहर गुन्हेशाखेच्या गुंडाविरोधी पथकाने त्यांना मालेगावातून शिताफीने अटक केली आहे. (Nashik Crime Two arrested from Malegaon in deadly attack)

गौरव रामादास साटोटे (२४), सौरभ रामदास साटोटे (२१, रा. समतानगर, उपनगर) अशी अटक करण्यात आलेल्या दोघा संशयितांची नावे आहेत. गेल्या १४ मार्च रोजी संशयितांनी सागर राम सदावर्ते यांच्यावर प्राणघातक हल्ला केला होता. याप्रकरणी उपनगर पोलिसात गुन्हा दाखल होता. मात्र संशयित पसार झाले होते.

या गुन्ह्याचा समांतर तपास शहर गुन्हेशाखेच्या गुंडाविरोधी पथक करीत होते. मात्र संशयितांचा कोणताही सुगावा लागत नव्हता. पथकाने तांत्रिक व मानवी कौशल्य वापरून संशयितांचा शोध घेतला असता, संशयित हे येसगाव, मालेगाव येथे असल्याची खबर मिळाली. त्यानुसार, गुंडाविरोधी पथकाने शनिवारी (ता. १३) रात्री येसगाव गाठून दोघांना शिताफीने जेरबंद केले.

यापकरणी अधिक तपासासाठी दोघांना उपनगर पोलिसांच्या ताब्यात देण्यात आले आहे. सदरची कामगिरी गुंडाविरोधी पथकाचे सहायक निरीक्षक ज्ञानेश्वर मोहिते, अंमलदार विजय सूर्यवंशी, प्रदीप ठाकरे, गणेश भागवत, अक्षय गांगुर्डे यांच्या पथकाने बजावली.