नाशिक : सत्ता गेल्याने 'कारभाऱ्यांची' वाहनेही धूळखात

नाशिक : सत्ता आहे तोपर्यंतच महत्त्व, सत्ता गेली म्हणजे रवानगी अडगळीतच होते. याचा प्रत्यय सध्या महापालिकेत येते आहे. एरवी शहरभर फिरणारी महापालिकेतील कारभाऱ्यांची वाहन सध्या धूळखात पडून आहे. एरवी सकाळी दिवस सुरू झाल्यापासून लग्नकार्य, दशक्रिया विधीसह गल्लोगल्ली फिरणाऱ्या वाहनांची धूळ पुसायला कुणाला वेळ नाही. निवडणुका लांबल्याने प्रशासकीय कारकीर्द सुरू झाल्याचा हा महिमा सध्या महापालिकेत पाहायला मिळतो आहे.

महापालिकेची निवडणूक लांबल्यानंतर नाशिक महापालिकेत प्रशासकीय राजवट सुरू झाली आहे. त्यामुळे महापौर, विविध समिती सभापतींची वाहने धूळखात पडून आहे. प्रशासकीय राजवटीत पदाधिकारी राहिलेले नाही. त्यामुळे विविध पदाधिकाऱ्यांना देण्यात आलेल्या वाहनांची सुविधा काढण्यात येऊन ती वाहने महापालिकेत जमा करण्यात आली आहे. मात्र, अशा वाहनांवर धूळ खाण्याची वेळ आली आहे. १३ मार्चला महापौरांसह सर्व नगरसेवकांची मुदत संपल्याने नाशिक महापालिका आयुक्त यांच्यावर शासनाने प्रशासकाची जबाबदारी दिली.

प्रशासनातर्फे महापौरांना देण्यात आलेल्या शासकीय निवासस्थानसह महापौर, उपमहापौर, विरोधी पक्षनेते, सभागृहनेते तसेच विभागीय सभापती यांना देण्यात आलेली वाहन सुविधा जमा करून ताब्यात घेतली. अशा प्रकारच्या गाड्या सध्या महापालिकेच्या राजीव गांधी भवन या मुख्यालयात उभे करण्यात आल्या आहेत. पदाधिकाऱ्यांची वाहने जमा झाल्यानंतर त्यांच्यावर ज्या चालकांची नियुक्ती होती. त्यांच्याकडे दुसरी जबाबदारी देण्यात आल्यामुळे महापालिकेकडून लाखो रुपये खर्चून घेण्यात आलेल्या वाहने त्यांची देखभाल करण्यासाठी कोणीच राहिले नाही. यामुळे हे महागडी वाहने धूळखात पडून आहे.