Nashik Goda Mahaarti: गोदा महाआरतीत आता विघ्न सर्पांचे! पाणवेलीबरोबरच मोठ्या प्रमाणावर वाहून आल्याने भीतीचे वातावरण

नाशिक : सध्या गोदापात्रात पाण्याचा विसर्ग सुरू आहे. पण या पाण्याबरोबरच मोठ्या प्रमाणावर पाणवेली व त्यातून सर्प वाहून येत आहेत. त्यामुळे सायंकाळी गोदा महाआरतीत सहभाग घेणाऱ्यांसह सायंकाळी नदीकिनारी फिरायला जाणाऱ्यांमध्ये भितीचे वातावरण आहे. (Nashik Goda Mahaarti snakes disturbing marathi news)

गोदापात्रात आवर्तनानुसार पाण्याचा विसर्ग सुरू आहे. या पाण्यात मोठ्या प्रमाणावर पाणवेली वाहून आल्या असून त्या तिसऱ्या दिवशीही गाडगे महाराज पुलालगत अडकून पडल्या आहेत. या पाणवेलींबरोबरच नदीच्या वरील भागात पाणसर्प व इतर सरपटणारे प्राणी मोठ्या प्रमाणावर वाहून आले आहेत. त्यामुळे गोदाकाठी नियमित फेरफटका मारणाऱ्यांसह या आरतीत सहभागी होणाऱ्यांमध्ये भितीचे वातावरण आहे.

सध्या गोदा आरतीचा माहोल टिपेला पोचला असून नाशिककर भाविकांत त्याबाबत मोठी उत्सुकता आहे. याशिवाय यात्रोत्सवासाठी शहरात आलेले पर्यटक भाविकही गोदा महाआरतीत सहभाग नोंदवत असल्याने हरिद्वार, काशीसारखीच ही आरतीही भव्यदिव्य होऊ लागली आहे. मात्र गेल्या काही दिवसांपासून नदीपात्रात पाणी व पाणवेलींबरोबरच मोठ्या प्रमाणावर सर्पही वाहून येत आहेत. त्यामुळे भाविकांत भितीचे वातावरण आहे. (latest marathi news)

मुलीला सर्पदंश

मध्यंतरी परराज्यातून आलेल्या एका भाविकांच्या मुलीला नदीपात्रात सर्पदंश झाल्याची माहिती पुरोहितांनी दिली. या मुलीला सर्पदंश झाल्यानंतर जिल्हा रुग्णालयात दाखल करण्यात आले होते. त्या मुलीचे पुढे काय झाले हेही गुलदस्त्यातच आहे. मात्र पाण्यातील सर्पांची धास्ती अनेकांनी घेतली आहे, हे या भागात फेरफटका मारला असता जाणवते.

"सध्या गोदा महाआरतीला मोठी गर्दी उसळत आहे. परंतु दहा दिवसांपूर्वी सोडलेल्या पाण्यातून मोठ्या प्रमाणावर सर्प वाहून येत असल्याने भाविकांत भितीचे वातावरण आहे. त्यासाठी उपाययोजना व्हावी."- प्रतीक शुक्ल, गंगा गोदावरी पुरोहित संघ