नाशिक : आदिवासी कुटुंबातील लेकरांना मदतीचा हात

देवळा/ खामखेडा : वार्शी (ता. देवळा) येथील आदिवासी कुटुंबातील कर्त्या व मातृत्व जपणाऱ्‍या महिलेचे नुकतेच निधन झाल्याने तिच्या चार मुलांचे मायेचे छप्पर तर हिरावले गेलेच; शिवाय या कुटुंबाची परिस्थिती हलाखीची असल्याने आता पुढे काय, असा प्रश्‍नही निर्माण झाल्याची चर्चा सोशल मीडियातून व्यक्त होतात समाजातील संवेदनशीलता जोपासणाऱ्या सामाजिक संस्था, तसेच व्यक्तींनी तातडीची मदत उपलब्ध करून दिली. यामुळे या कुटुंबास हातभार लागला आहे. मुलांच्या शिक्षणाची व मुलींच्या लग्नापर्यंतची जबाबदारी शिवनिश्‍चल सेवाभावी ट्रस्टने घेतली.

तालुक्यातील वार्शी या आदिवासीबहुल गावातील उन्हाजी पवार यांची पत्नी संगीता हिचे पाच दिवसांपूर्वी आजाराने निधन झाले. या दाम्पत्यास चार लहान मुले असून, आर्थिक परिस्थिती अत्यंत गरिबीची आहे. हातावर पोट असणाऱ्या या कुटुंबाची कथा सामाजिक माध्यमातून प्रकट होताच काही मदतीचे हात तातडीने पुढे आल्याने समाधान व्यक्त केले जात आहे. त्यात माध्यमिक शिक्षणाधिकारी मच्छिंद्र कदम यांनी रोख अकरा हजार रुपयांची मदत या कुटुंबाकडे पोहोच केली. देवळा पोलिस ठाण्यातील पोलिस नाईक निलेश सावकार व सचिन भामरे यांनीही पाच हजार रुपये या कुटुंबाला देऊ केले.

शिवव्याख्याते तथा शिवनिश्‍चल सेवाभावी ट्रस्टचे अध्यक्ष यशवंत गोसावी यांना या कुटुंबाची स्थिती कळताच त्यांनी थेट या कुटुंबाची भेट घेत त्यांना पंधरा हजार रुपये दिले. शिवाय या लहानग्या मुलांच्या शिक्षणाची व मुलींच्या लग्नापर्यंतची जबाबदारी स्वीकारत जणूकाही हे कुटुंबच दत्तक घेतले. या वेळी राष्ट्रीय सेवा योजनेचे जिल्हा समन्वयक डॉ. डी. के.आहेर, प्रहारचे कृष्णा जाधव आदी उपस्थित होते.

देवळा तहसिलदारांनीही या कुटुंबास किराणा व धान्य उपलब्ध करून दिले. तसेच, खालप येथील माजी उपसरपंच व शिवसेनेचे माजी विभागप्रमुख बारकू सूर्यवंशी यांनीही अकरा हजार रुपये या कुटुंबास देत हातभार लावला. मदतीचा हा स्रोत चालू असल्याने हे कुटुंब सावरण्यास मदत झाली आहे.

शिवनिश्‍चल सेवाभावी ट्रस्टने उचलली शिक्षणाची जबाबदारी