NMC News : निच्चांकी मतदानाच्या केंद्रांवर महापालिकेचे वर्कआऊट; टक्का वाढविण्यासाठी उपाययोजना

NMC News : मतदानाची टक्केवारी कमी असलेल्या केंद्रावर मतदानाचा टक्का वाढविण्याची जबाबदारी स्थानिक स्वराज्य संस्थेवर दिली आहे. त्याअनुषंगाने महापालिकेकडून चाळीस टक्क्यांपेक्षा कमी मतदान झालेल्या २४ केंद्रांवर उपाययोजना केल्या आहेत. परंतु टक्का वाढविण्यासाठी उपाययोजनांची अंमलबजावणी करताना दमछाक होणार आहे. स्थानिक स्वराज्य संस्थांना मतदानाची टक्का वाढविण्याची जबाबदारी देण्यात आली आहे. (nashik Municipal Corporation workout on low polling stations marathi News )

आतापर्यंत जनजागृती करण्यापुरतेच महापालिकेचे काम होते. परंतु ते कामदेखील पूर्ण क्षमेतेने होत नव्हते. परंतु यंदा टक्का वाढविण्याच्या स्पष्ट सूचना आहेत. जिल्हा प्रशासनाने त्यानुसार सूचना दिल्या आहेत. महापालिका हद्दीत विधानसभेचे २४ मतदान केंद्रे असे आहेत की त्यावर मागील विधानसभा निवडणुकीत चाळीस टक्क्यांपेक्षा कमी मतदान झाले. यामध्ये मध्य विधानसभा मतदारसंघात सोळा मतदान केंद्रे आहेत.

पूर्व विधानसभा मतदारसंघात सात, देवळाली विधानसभा मतदारसंघात एक मतदान केंद्रे आहेत. पश्‍चिम विधानसभा मतदारसंघात सर्वच मतदान केंद्रावर चाळीस टक्क्यांपेक्षा अधिक मतदान झाले. मध्य विधानसभा मतदारसंघात बजरंगवाडी मधील सात मतदान केंद्रावर फक्त १९ टक्के मतदान झाले. २२१ ते २२७ या सात मतदान केंद्रांवर सर्वाधिक निच्चांकी म्हणजे १९ टक्के मतदान झाले..(latest marathi news)

उपनगर भागातील २१० ते २१४ या मतदान केंद्रावर २३ टक्के मतदान झाले. चोवीस मतदान केंद्रावरील मतांचा टक्का साठपेक्षा अधिक असणे प्रशासनाला गरजेचे वाटते. त्यामुळे अशा ठिकाणी उपाययोजना केल्या जात आहेत. मतदार जागृती हा त्यातील पहिला पर्याय आहे. मतदारांनी घराबाहेर पडावे, असे आवाहन केले जात आहे.

या मतदान केंद्रांवर लक्ष

- मध्य - २२१ ,२२२,२२३,२२४,२२५,२२६ २२७, २१० ,२११,२१२,२१३,२१४, १४४ ते १४५, ५२, २३०.

- पूर्व - ६३,६९,२०५,२३८,२३९, ३१६,३०७.

- देवळाली - १५०.