Nashik Onion News : कसमादेत दसऱ्याला नवा लाल कांदा बाजारात! बाजारात कांदा आणण्याची लगबग

मालेगाव : तालुक्यासह कसमादेत या वर्षी झालेल्या समाधानकारक पावसामुळे खरीप व लेट खरीप कांद्याचे जम्बो उत्पादन घेतले जात आहे. गेल्या वर्षाच्या तुलनेने कांदा लागवडीत ४० टक्क्यांपेक्षा अधिक वाढ झाली आहे. शेतकऱ्यांकडे अजूनही १० ते १५ टक्के उन्हाळी कांदा चाळीमध्ये आहे. दसऱ्याच्या सुमारास नवीन लाल कांदा बाजारात येण्याची शक्यता आहे.

नवीन कांद्याला चांगला भाव मिळेल या दृष्टिकोनातून कांदा बाजारात आणण्यासाठी शेतकऱ्यांची लगबग सुरु आहे. दरम्यान येथील मुंगसे बाजारात उन्हाळी कांद्याला मंगळवारी (ता. ८) साडे चार हजार रुपये क्विंटल सर्वोच्च भाव मिळाला. (New Red Onion in kasmade on Dussehra)

कसमादेत गेल्या वर्षी उन्हाळी कांद्याचे मोठ्या प्रमाणावर उत्पादन घेण्यात आले. सुरवातीला शेतकऱ्यांनी मिळेल त्या भावात कांदा विक्री केली. लोकसभा निवडणुकीत फटका बसल्यानंतर केंद्र शासनाने निर्यातबंदी उठवली. गेल्या चार महिन्यापासून कांद्याला चांगला भाव मिळत आहे. मध्यंतरी भाव पाच हजारापर्यंत गेला होता. महिन्यापासून सरासरी बाजारभाव चार हजाराच्या आसपास आहे. यावर्षी चांगल्या पावसामुळे व कांद्याला मिळत असलेल्या भावामुळे खरीप व लेट खरीप कांदा मोठ्या प्रमाणावर लागवड करण्यात आला. (latest marathi news)

भावाची आशा

नवीन लाल कांद्याला पाच हजाराच्या वरच भाव मिळण्याची शक्यता आहे. खरीप हंगामात आगाऊ लागवड केलेला कांदा काढणीला आला आहे. दसऱ्याच्या पार्श्वभूमीवर काही ठिकाणी कांदा काढणीचे काम सुरु आहे. यावर्षी विजयादशमीला लाल कांदा मोठ्या प्रमाणात बाजारात दिसून येईल. दिवाळीनंतर मात्र मोठ्या प्रमाणावर कांदा बाजारात येवू शकेल. उन्हाळी कांद्याचे भाव अजूनही टिकून आहेत. येथील बाजार समितीच्या मुंगसे उप बाजारात मंगळवारी ४५१ वाहनातून कांदा विक्रीसाठी आला होता.

कांद्याचे भाव (दर प्रति क्विंटल)

- उन्हाळी कांदा ४२०० ते ४ ५००,

- साधारण सुपर ३९०० ते ४२२५,

- गोल्टी-गोल्टा ३३०० ते ३८५०,

- खाद- चोपडा १५०० ते २ ६००