Nashik: मदरशात शिक्षणाच्या नावाखाली लहान मुलांची तस्करी? तपासासाठी दोन पथके सांगली बिहारकडे रवाना

भुसावळ/मनमाड: बिहारमधून महाराष्ट्रात लहान मुलांच्या तस्करीचे एक मोठे रॅकेट उघडकीस आले आहे. या प्रकरणी २९ मुलांना जळगावच्या तर ३० मुलांना नाशिकच्या बालसुधारगृहात दाखल केले आले आहे.

दरम्यान, या प्रकरणात अटकेत असलेल्या पाच संशयितांपैकी हजरत मौलाना मोहम्मद आलम यास भुसावळ रेल्वे सुरक्षा बल व लोहमार्ग पोलिसांनी रेल्वे न्यायालय भुसावळ येथे हजर केले असता त्यास सोमवारपर्यंत (ता.५) पोलिस कोठडी देण्यात आली तर इतर चौघा संशयितांना मनमाड लोहमार्ग पोलिसांनी चांदवड न्यायालयापुढे हजर केले असता बारा दिवसांची पोलिस कोठडी सुनावली आहे.

बिहारमधून महाराष्ट्रात लहान मुलांच्या या तस्करीच्या गुन्ह्यात रेल्वे पोलिसांनी मंगळवारी (ता. ३०) दानापूर-पुणे एक्स्प्रेसमधून भुसावळ येथे २९ तर मनमाड रेल्वेस्थानकावर ३० अशा ५९ बालकांची सुखरूप सुटका करून तस्करी करणाऱ्या पाच संशयित तस्करांना अटक केली आहे. या मुलांना सांगली येथील मदरशात शिक्षणाच्या नावाखाली घेऊन जात तस्करी करत असल्याचा संशय रेल्वे पोलिसांनी व्यक्त केला आहे.

भुसावळला अटकेत असलेला संशयित हजरत मौलाना मोहम्मद आलम यास पाच दिवसांची तर सद्दाम हुसेन सिद्दिकी, नौमान सिद्दिकी, एजाज सिद्दिकी, मोहम्मद शहा (रा. सर्व अररिया बिहार) या चौघा संशयिताना मनमाड लोहमार्ग पोलिसांनी ताब्यात घेऊन चांदवड न्यायालयापुढे हजर केले असता बारा दिवसांची पोलिस कोठडी सुनावली आहे.

या प्रकरणी दोन पथके तयार करण्यात आली आहेत. त्यातील एक पथक सांगली तर दुसरे पथक शुक्रवारी (ता.२) बिहारला रवाना होणार आहे. बालकल्याण समिती व कमिटीतर्फे मुलांची

चौकशी सुरू आहे. भुसावळ लोहमार्ग पोलिस ठाण्याला महाराष्ट्र बालकल्याण आयोगाच्या सदस्यांनी भेट देऊन या

प्रकरणाची सर्व माहिती

पोलिस निरीक्षक विजय घेरडे यांच्याकडून जाणून घेतली. सदरील तपासाअंती पोलिसांच्या हाती मोठे घबाड लागण्याची शक्यता नाकारता येत नाही.