Nashik ZP News : जि. प.च्या 4 संवर्गाच्या परीक्षेचा निकाल जाहीर

Nashik ZP News : ग्रामविकास विभागाच्या मान्यतेनुसार कनिष्ठ लेखाधिकारी, कनिष्ठ आरेखक, कनिष्ठ यांत्रिकी, विस्तार अधिकारी (शिक्षण) या पदांच्या झालेल्या परीक्षेचा निकाल ‘आयबीपीएस’कडून प्राप्त झाल्यानंतर शनिवारी (ता. १७) मुख्य कार्यकारी अधिकारी आशिमा मित्तल यांच्या मान्यतेने जाहीर करण्यात आला. ()

हा निकाल जिल्हा परिषदेच्या https://zpnashik.maharashtra.gov.in या संकेतस्थळावर प्रसिद्ध करण्यात आला आहे, असे उपमुख्य कार्यकारी अधिकारी रवींद्र परदेशी यांनी सांगितले. जिल्हा परिषदेकडून ५ ऑगस्ट २०२३ ला एकूण २० संवर्गामधील एक हजार ३८ रिक्त पदांसाठी जाहिरात देण्यात आली होती. त्यानुसार १५ संवर्गाकरिता ऑनलाइन परीक्षा झाली.

कंत्राटी ग्रामसेवक, आरोग्यसेवक ४० टक्के (पुरुष), आरोग्यसेवक ५० टक्के (पुरुष), आरोग्यसेवक (महिला) आणि अंगणवाडी पर्यवेक्षिका या पाच संवर्गांच्या परीक्षा नियोजित असून, शासनाच्या मान्यतेनुसार त्या घेण्यात येणार आहेत. पहिल्या टप्प्यात झालेल्या कनिष्ठ लेखाधिकारी, कनिष्ठ आरेखक, कनिष्ठ यांत्रिकी व विस्तार अधिकारी (शिक्षण) या परीक्षेचा निकाल घोषित करण्यात आला आहे.