NMC News : पाणीपुरवठा योजनांसाठी केंद्राकडून 342 कोटी

NMC News : शहरवासीयांना सुरळीत पाणीपुरवठा व्हावा यासाठी खासदार गोडसे आणि महापालिका प्रशासनाकडून सुरू असलेल्या पाठपुराव्याला यश आले आहे. अमृत दोन अभियानांतर्गत महापालिका हद्दीत पाणीपुरवठा आणि पाइपलाइन संदर्भातील विविध कामांसाठी केंद्राकडून ३४२ कोटी रुपयांच्या कामाला प्रशासकीय मान्यता मिळाली आहे. (nashik NMC water supply scheme marathi news )

शासनाने ३४२ कोटी रुपयांच्या कामाला प्रशासकीय मान्यता दिल्याने शहराच्या सहा विभागातील जुन्या तसेच खराब झालेल्या पाइपलाइन बदलण्यात येणार असून काही ठिकाणी नवीन पाइपलाइन टाकल्या जाणार आहे. गेल्या काही वर्षांपासून शहरातील पाणीपुरवठा विस्कळित झाला होता. अनेक ठिकाणी मुख्य पाइपलाइन आणि मुख्य पाईपलाईनच्या उपलाईन जुनाट झाल्याने गळतीचे प्रमाण वाढल्याने नागरिकांना अपुरा पाणीपुरवठा होत होता.

काही ठिकाणी अपुऱ्या पाइपलाइन असल्याने पाण्यासाठी महिलांची ओरड होत असे. या परिस्थितीची गंभीर दखल घेत महापालिका प्रशासनाने शहरवासीयांना पुरेसा आणि सुरळीत पाणीपुरवठा व्हावा यासाठीचा प्रस्ताव तयार करून निधी उपलब्धतेसाठी प्रस्ताव केंद्राकडे पाठविला होता.

अमृत -२ अभियानांतर्गत केंद्राने नाशिक महानगरपालिकेचा प्रस्ताव मंजूर केला असून यासाठी ३४२ कोटी रुपयांच्या कामांना प्रशासकीय मान्यता दिली आहे. प्रशासकीय मान्यता मिळालेल्या कामांमध्ये शिवाजीनगर आणि गांधीनगर येथील वॉटर सिस्टीम प्लांटची दुरुस्ती आणि देखभाल करणे.

सहा ठिकाणच्या पाण्याच्या टाकीपर्यंतच्या मुख्य जुनाट झालेल्या पाइपलाइन बदलून त्या ठिकाणी नवीन पाइपलाइन बसविणे, मुख्य पाईपलाईनद्वारे पुढे गेलेल्या पण खराब झालेल्या बारा ठिकाणच्या उप पाइपलाइन बदलून त्या ठिकाणी नवीन पाइपलाइन टाकणे, सहा विभागात प्रत्येकी एक - एक ठिकाणी नवीन ठिकाणी पाइपलाइन टाकणे, लव्हाटेनगर येथे एसआर बांधणे आदी कामे केली जाणार आहेत. ( latest marathi news )