Nashik NMC News : बेकायदा होर्डिंग्ज ताब्यात घेण्याची कारवाई सुरू

Nashik NMC News : शहरात २८ होर्डिंग्जसाठी परवानगी असताना त्याहून अधिक म्हणजे जवळपास ६३ होर्डिंग्ज लावले गेल्याचा प्रकार चौकशीतून समोर आला. यानंतर आता महापालिकेच्या विविध कर विभागाने बेकायदा होर्डिंग्ज ताब्यात घेण्याची कारवाई सुरू करून संबंधित ठेकेदाराला नोटीस बजावली आहे.

विभागीय आयुक्तांच्या पत्राचा आधार घेत तीन वर्षात बेकायदेशीर उभारलेल्या होर्डिंग्जच्या माध्यमातून किती महसूल मिळवला गेला याची माहिती घेऊन दंडात्मक कारवाई केली जाणार असल्याची माहिती कर उपायुक्त विवेक भदाणे यांनी दिली. (Nashik NMC illegal hoardings started news)

जाहिरात व परवाने विभागातील कर्मचाऱ्यांनी करारातील अटी व शर्ती बदलून संगनमताने होर्डिंग्ज घोटाळा केल्याचा आरोप काही दिवसांपूर्वी नाशिक आउटडोअर ऍडव्हर्टायझेशन वेल्फेअर असोसिएशनच्या वतीने करण्यात आला होता. त्याअनुषंगाने महापालिका आयुक्त डॉ. अशोक करंजकर यांनी चौकशी समिती गठित केली.

अतिरिक्त आयुक्त प्रदीप चौधरी यांच्या अध्यक्षतेखाली समितीने अहवाल आयुक्तांकडे सादर केला. निविदेतील अटी व शर्ती निश्चित करताना विशिष्ट मक्तेदारांना लाभदायक ठरेल अशा अटी तयार करण्यात आल्याचा आरोप करण्यात आला होता. यातून महापालिकेचा करोडो रुपयांचा कर बुडाल्याचा दावा असोसिएशनने केला.  (latest marathi news)

निविदा प्रक्रियेत मक्तेदाराला कार्यारंभ आदेश देताना मात्र अटी व शर्तीची उल्लंघन करून रस्ते, वाहतूक भेट, दुभाजक, इमारती, उद्याने वापरातील व वापरात नसलेल्या जागा, बांधीव मिळकतींवर, जाहिरात फलक उभारण्याची परवानगी दिली होती. निविदेत फक्त जाहिरात फलक असा उल्लेख असताना कार्यारंभ आदेश देताना मात्र प्रकाशित फलक, युनिपोल, एलईडी वॉल आदींना परवानगी दिली गेली. एकच दर लावले. यामुळे करोडोचे आर्थिक नुकसान होत असल्याचा आरोप असोसिएशनने केला.

ठेकेदाराला नोटीस

समितीच्या चौकशीत ११ ठिकाणी परवानगी मिळण्यापूर्वीच होर्डिंग लावल्याचे समोर आले होते. त्यामुळे विनापरवानगी उभारण्यात आलेले होर्डिंग्ज ताब्यात घेण्याची प्रक्रिया सुरू करण्यात आली असून होर्डिंग्ज उभारण्यासाठी तयार करण्यात आलेले स्ट्रक्चर काढून घेण्याची नोटीस ठेकेदाराला बजावली आहे.