NMC News : महापालिकेचे कामकाज ठप्प; अडीच हजार कर्मचाऱ्यांची नियुक्ती

NMC News : लोकसभा निवडणुकीसाठी अडीच हजार कर्मचाऱ्यांची मागणी जिल्हा निवडणूक शाखेकडून करण्यात आल्याने पालिकेचे कामकाज पूर्णपणे ठप्प होणार आहे. टप्प्या-टप्प्याने कर्मचारी वर्ग निवडणूक शाखेकडे वर्ग होईल. त्याशिवाय महापालिकेची वीस वाहनेही निवडणूक कामासाठी मागविले आहेत. लोकसभा निवडणुकीसाठी आचारसंहिता लागू झाली आहे. (nashik NMC appointment of two thousand employees marathi news)

जिल्ह्यात नाशिक व दिंडोरी असे दोन लोकसभा मतदारसंघ आहेत. या दोन्ही मतदारसंघांत निवडणुकीचे काम करण्यासाठी शासकीय, निमशासकीय कर्मचाऱ्यांची नियुक्ती केली जाते. जिल्हाधिकारी कार्यालयातील निवडणूक शाखेने महापालिकेकडे अडीच हजार कर्मचाऱ्यांची मागणी केली आहे. मात्र महापालिकेकडेच सद्यस्थितीत कर्मचारी तुटवडा आहे. आर्थिक वर्ष अखेरमुळे पालिकेची अनेक कामे प्रलंबित आहेत. (latest marathi news)

त्यामुळे अडीच हजार कर्मचारी वर्ग झाल्यास पालिकेचे कामकाज पूर्णपणे ठप्प होणार आहे. निवडणुकीनिमित्त चार उपायुक्तांची बदली मूळ सेवेत झाली आहे. परिणामी विभाग प्रमुखांच्या जबाबदारीचे विभाजन व जबाबदारीत वाढ झाली आहे. त्यात अडीच हजार कर्मचारी वर्ग होणार असल्याने कामकाज पूर्णपणे ठप्प होणार आहे.

यांत्रिकी विभागाकडून वाहन निश्‍चिती

निवडणूक कामासाठी वाहनांची आवश्‍यकता भासणार आहे. त्याअनुषंगाने जिल्हा निवडणूक शाखेने महापालिका प्रशासनाला पत्र पाठवून पहिल्या टप्प्‍यात वीस वाहनांची मागणी केली आहे. यांत्रिकी विभागाकडून वाहनांची निश्‍चिती करून जिल्हाधिकारी कार्यालयाकडे यादी पाठविली जाणार आहे.