NMC News : सिंहस्थ कामांसाठी सल्लागार सर्वेक्षक

NMC News : आगामी सिंहस्थ कुंभमेळ्यासाठी महापालिकेकडून शहरात विविध प्रकारची कामे केली जाणार आहेत. साडेतीनशे किलोमीटर लांबीच्या रस्त्यासह तपोवनातील ७०० एकर साधूग्रामसाठी जागा विकसित करणे व तांत्रिक पद्धतीची कामे केली जाणार आहे. या कामांचे सर्वेक्षण करून सविस्तर प्राकलन करण्यासाठी सल्लागार सर्वेक्षक नेमण्याचा निर्णय घेण्यात आला आहे. २०१७ मध्ये नाशिक व त्र्यंबकेश्वर मध्ये कुंभमेळा होणार आहे. (nashik NMC Consultant Surveyor for Simhastha Works marathi news)

नाशिकमध्ये होणाऱ्या कुंभमेळ्यासाठी महापालिका पालक संस्था म्हणून काम पाहणार आहे. पायाभूत सेवा सुविधा पुरविण्याची जबाबदारी महापालिकेकडे आहे. कुंभमेळ्यासाठी महापालिकेने जवळपास अकरा हजार कोटींचा प्रारूप विकास आराखडा तयार केला आहे. शासनाने अद्याप या आराखड्याला मंजुरी दिलेली नाही. कुंभमेळ्यासाठी शिखर समिती स्थापन केली आहे.

या समितीसमोर अहवाल सादर केला जाणार आहे. तत्पूर्वी सिंहस्थासाठी तांत्रिक स्वरूपाची काही कामे केली जाणार आहे. त्यात बांधकाम, पाणीपुरवठा, मलनिस्सारण व्यवस्था, वैद्यकीय व घनकचरा व्यवस्थापन, विद्युत, उद्यान या विभागाशी संबंधित कामे आहेत. (latest marathi news

विविध रस्त्यांचे व घाटांचे रुंदीकरण, नदी नाल्यांची साफसफाई, मलनिस्सारण केंद्रांची उभारणी, पाणीपुरवठा विषयक कामे, विद्युत खांबांचे सर्वेक्षण, झाडांचे सर्वेक्षण, साधूग्रामचे सर्वेक्षण, लेआउट तयार करणे व त्याचे डिमार्केशन करणे, अंतर्गत व बाह्य वाहन तळांचे सर्वेक्षण करणे त्याचा ले-आउट तयार करणे, विविध जागा आरक्षित करणे, तात्पुरत्या स्वरूपात जागांचे अधिग्रहण करणे यासाठी सर्वेक्षण करून सविस्तर प्राकलन तयार केले जाणार आहे. त्यासाठी महापालिकेच्या महासभेत मंजुरी देण्यात आली आहे.

या कामांचे होणार सर्वेक्षण

- साधूग्रामसाठी ७०० एकर जागा.

- शहरात साडेतीनशे किलोमीटरचे रस्ते.

- नवीन रस्ते तयार करणे व अंतर्गत व बाह्य वाहन तळांचा विकास.

- जलशुद्धीकरण केंद्रे रुग्णालय पोलिस ठाणे, मंदिरे व मलनिस्सारण केंद्रे.