नाशिक : ...अन् चिमुरडा मातेच्या कुशीत सुखरूप परतला | Sakal
sakal

बोलून बातमी शोधा

Police

नाशिक : ...अन् चिमुरडा मातेच्या कुशीत सुखरूप परतला

म्हसरूळ (नाशिक) : वडापाव खाऊ घालतो, असे सांगत मुलास घेऊन फरार झालेल्या संशयिताच्या मुसक्या आवळत पंचवटी पोलिसांनी या अपहृत चिमुरड्याला त्याच्या भिक्षेकरी मातेच्या कुशीत सुखरूप परत केले आहे. पोलिसांनी मोठ्या शिताफीने तपास करीत अवघ्या १२ तासांत या घटनेचा छडा लावला आहे. राजू ऊर्फ रतन बबन वाघ (३८, रा. जऊळके, ता. दिंडोरी), असे अटक केलेल्या संशयिताचे नाव आहे.

शनिवारी (ता. १) सकाळी रामकुंड भागातून शीतल शिरसाट यांच्या पतीच्या ओळखीचे राजू वाघ हा ६ वर्षीय दीपकला वडापाव खाऊ घालून आणतो, असे सांगत घेऊन गेला. त्यानंतर तो परत आला नाही. याप्रकरणी शीतल शिरसाट यांनी पंचवटी पोलिसांत तक्रार केली होती. त्यानुसार पोलिसांनी लागलीच तपास केला. वर्णनानुसार पोलिसांनी जवळपास ३०० संशयित व्यक्तीची चौकशी केली. दरम्यान, संशयित रविवार कारंजा, दूधबाजार परिसरात असल्याची माहिती मिळाली. त्यानुसार पोलिसांना संशयित व्यक्ती मुलासह आढळून आला. पोलिसांनी त्यास ताब्यात घेतले. पोलिस चौकशीत त्याने मुलगा झोपल्याने त्यास त्याच्या आईजवळ आणले नसल्याचे संशयिताने सांगितले. सदरची उल्लेखनीय कामगिरी पोलिस आयुक्त दीपक पांडे, उपायुक्त अमोल तांबे, सहायक आयुक्त मधुकर गावित, निरीक्षक (गुन्हे) युवराज पत्की यांचे मार्गदर्शनाखाली पंचवटी पोलिस ठाण्याचे गुन्हे शोध पथकाचे सहायक निरीक्षक सत्यवान पवार व पथकातील अंमलदार यांनी पार पाडली.

हेही वाचा: आईनं जुळ्यांना दिला जन्म, पण दोन भिन्न वर्षात असणार वाढदिवस

कामगिरीचे कौतुक

अनेकदा पोलिसांवर 'ते फक्त ज्याचा वशिला आहे, अशांची अन् राजकीय नेते व बड्या लोकांचीच कामे करतात, असे आरोप होत असतात. परंतु, एका भिक्षेकऱ्याच्या अपहृत मुलाला शोधण्यासाठी पोलिसांनी कौशल्य पणाला लावले. त्यासाठी जवळपास ३०० व्यक्तींकडे चौकशी केली आणि बारा तासांतच अपहृत मुलाचा शोध लावला व संशयिताच्या मुसक्या आवळल्या. पोलिसांसाठी सर्वच जण सारखेच असल्याचे या कामगिरीतून पंचवटी पोलिसांनी सुखावून दिले आहे. त्यांच्या या कामगिरीवर सर्वच स्तरातून कौतुकाचा वर्षाव होत आहे.

हेही वाचा: सावत्र आई असली म्हणून काय झालं? अर्जुन झाला भावूक

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :NashikCrime News
loading image
go to top