Nashik Water Scarcity : पालकमंत्र्यांकडून आज टंचाईचा आढावा

Nashik Water Scarcity : शहरातील पाणीकपात तूर्त टळलेली असली तरी जिल्ह्यात भीषण दुष्काळ असल्याने पाण्यासह चाऱ्याचे नियोजन करण्यासाठी पालकमंत्री दादा भुसे शुक्रवारी (ता. २३) दुपारी दीडला जिल्हाधिकारी कार्यालयात आढावा बैठक घेणार आहेत. जिल्ह्यातील गंगापूरसारख्या प्रमुख धरणातील साठा गेल्या वर्षीच्या तुलनेत १३ टक्क्यांनी कमी आहे. (Nashik Review of water shortage marathi news )

त्यामुळे भविष्यात पाणीकपातीची टांगती तलवार नाशिककरांवर आहे. लोकसभा निवडणुकीची रणधुमाळी सुरू असताना लोकप्रतिनिधी आणि प्रशासन पाणी संभाव्य कपातीचा निर्णय घेणार का, याबाबत प्रश्नचिन्ह उपस्थित केले जात आहे. दुसरीकडे ग्रामीण भागातून टँकरची मागणीही वाढत असून, १७० टँकरच्या माध्यमातून ५५९ गावे, वाड्या-वस्त्यांना पाणीपुरवठा केला जात असून, टँकरची मागणीही वाढत आहे.

दरम्यान, आगामी सिंहस्थ कुंभमेळा पूर्वतयारीचा आढावा पालकमंत्री घेणार आहेत. प्रशासनाने त्यासाठी ११ हजार कोटींचा आराखडा तयार केला आहे. तसेच शासकीय वैद्यकीय महाविद्यालयाची पाहणी व आढावा ते जाणून घेणार आहेत. जिल्हा शासकीय रुग्णालयात दुपारी साडेचारला ही बैठक होणार आहे. (latest marathi news)