Summer Heat : उन्हाच्या झळांनी अकरानंतर रस्ते निर्मनुष्य; पारा चाळीशीकडे

Summer Heat : मालेगाव पाठोपाठ नाशिकचा पाराही चाळीशीकडे सरकू लागल्याने शहरातील सर्वच रस्ते सकाळी अकरानंतर निर्मनुष्य होऊ लागले आहेत. उन्हाच्या चटक्याच्या भीतीने अनेक दुचाकीस्वार सिंग्नलवर न थांबता परिसरातील झाडांचा किंवा दुकानांच्या आसऱ्याने दुचाकी थांबवतात किंवा लाल दिवा असूनही सुसाट सुटत असल्याचे चित्र आहे. वाढत्या तापमानात भरपूर पाणी पिण्याचा सल्ला तज्ज्ञांनी दिला आहे. (nashik Roads are deserted after eleven due to heat of summer marathi news)

कधीकाळी चार- पाच किलोमीटर परिघात सीमित असलेले नाशिक आज पांडव लेणी, चामर लेण्यांच्या पलिकडे सरकून महानगर झाले आहे. शहराची लोकसंख्याही पंचवीस लाखांच्या आसपास पोचली आहे. वाढत्या शहरीकरणामुळे पूर्वी मोठ्या प्रमाणावर असलेली वृक्षवल्ली कमी झाली असून सिमेंट व डांबरीकरण वाढले आहे. त्यामुळे शहर सोडाच परिसरातही मातीचा रस्ता शोधावा लागतो. याचा परिणाम तापमान वाढीवर झाला आहे.

महानगराची सीमा सोडाच त्याही पलिकडे ग्रामीण भागातही मोठ्या प्रमाणावर सिमेंटची जंगले उभी राहू लागली. शहर परिसरातील शेतीची जागा उंचउंच टॉवरने घेतली आहे. सहाजिकच शहराची थंड हवेचे ठिकाण ही ओळख येत्या काळात उष्ण हवेचे ठिकाण या नव्या ओळखीने घेतली आहे. याचा परिणाम मेनरोड सारख्या बाजारपेठेवरही जाणवू लागला आहे. (latest marathi news)

दुपारी बारानंतर एरवी प्रचंड गर्दी असलेल्या मेनरोड, शालिमार रविवार पेठ या बाजारपेठेतही जाणवू लागल्याचे या भागातील व्यावसायिकांनी सांगितले. वाढत्या तापमानामुळे दुपारनंतर सिंग्नलवरील लाल दिवा चालू असलातरी अनेकजण सुसाट सुटत असल्याचे चित्र आहे. कायद्याचा धाक असलेले काहीजण मात्र तीव्र उन्हात थांबण्यापेक्षा जवळपासच्या झाडाच्या सावलीचा आसरा शोधत असल्याचे दिसून येते.

गोदाघाटावर स्नानासाठी गर्दी

सकाळी सात आठपासून प्रचंड उकाड्याला सुरवात होते, त्यामुळे अगदी डिसेंबरअखेर सुखद गारवा अनुभवणाऱ्यांना हेच का थंड हवेचे शहर असा प्रश्‍न पडतो. उन्हाच्या काहिलीपासून बचावासाठी दुपारनंतर गांधी तलाव, रामतीर्थ, दुतोंड्या मारुती कुंड आदी भागात स्नानासाठी मोठी गर्दी उसळतेय. यात तरुणाईबरोबच चिमुरड्यांचा सहभाग वाढतो आहे.

उन्हाच्या तीव्रतेपासून सुटका करण्यासाठी अनेकांनी उसाचा रस, ज्यूस, लिंबू सरबत आदींना पसंती दिली आहे. त्यात अनेकांची पसंती आरोग्याला अपायकारक नसलेल्या उसाच्या ताज्या रसाबरोबरच लिंबू सरबत, मठ्ठा, कोकम सरबत यांना मिळत आहे. वाढत्या तापमानाने रसवंत्यांमध्येही गर्दी उसळू लागली आहे.