नाशिक जिल्ह्यात एक हजार ६८ कोरोना बाधितांवर उपचार सुरु

नाशिक : जिल्‍ह्यात ॲक्‍टिव्‍ह रुग्‍ण संख्येत किरकोळ प्रमाणात घट होते आहे. मंगळवारी (ता.१७) जिल्‍ह्‍यात ऐंशी रुग्‍णांचे अहवाल पॉझिटिव्‍ह आले. तर नव्वद रुग्‍णांनी कोरोनावर यशस्‍वीरीत्‍या मात केली. दोन बाधितांचा उपचारादरम्‍यान मृत्‍यू झाला. सद्यःस्‍थितीत जिल्‍ह्यात एक हजार ०६८ बाधितांवर उपचार सुरु आहेत.

मंगळवारी नाशिक महापालिका क्षेत्रात ४८, नाशिक ग्रामीण क्षेत्रात २५, मालेगावला एक तर जिल्‍हा बाहेरील सहा रुग्‍णांचे अहवाल पॉझिटिव्‍ह आले. दोन मृतांची नोंद झाली असून, यापैकी प्रत्‍येकी एक नाशिक शहर व नाशिक ग्रामीणमधील आहेत.

सायंकाळी उशीरापर्यंत ७०७ रुग्‍णांचे अहवाल प्रलंबित होते. यापैकी सर्वाधिक ३८१ नाशिक ग्रामीण, १७८ मालेगाव तर नाशिक शहरातील १४८ रुग्‍णांना अहवालाची प्रतिक्षा होती. जिल्‍हा भरातील रुग्‍णालये व गृहविलगीकरणात ८४८ रुग्‍ण दाखल झाले. यात नाशिक महापालिका क्षेत्रातील ८३२ रुग्‍णांचा समावेश आहे. जिल्‍हा रुग्‍णालयात दोन रुग्‍ण दाखल झाले. नाशिक ग्रामीणमधील चौदा रुग्‍णांचा समावेश आहे. जिल्‍ह्यातील एकूण कोरोना बाधितांची संर्खया चार लाख चार हजार २२५ झाली असून, यापैकी तीन लाख ९४ हजार ६०४ रुग्‍णांनी कोरोनावर यशस्‍वीरीत्‍या मात केली आहे. आत्तापर्यंत आठ हजार ५५३ बाधितांचा कोरोनाने बळी घेतला आहे.