बालविवाहविरोधात काम करण्याची गरज : डॉ. प्रमोद पांढरे

जळगाव - जिल्ह्यातील बालविवाहाचे प्रमाण कमी करून जळगाव जिल्हा बालविवाह मुक्त करण्यासाठी, मुलींना सक्षम करण्यासाठी, कुपोषण कमी करण्यासाठी आरोग्य विभागातील गटप्रवर्तक, आशावर्करांनी पुढे येऊन एकत्रितरीत्या बालविवाह विरोधात काम करण्याची गरज असल्याचे, प्रतिपादन जिल्हा आरोग्य अधिकारी डॉ. प्रमोद पांढरे यांनी केले.

महिला व बालविकास विभाग, युनिसेफ व सेंटर फॉर सोशल अॅण्ड बिहेविअर चेंज कम्युनिकेशन (एसबीसी ३) यांच्यातर्फे महाराष्ट्रातील बालविवाह निर्मूलनासाठी आरोग्य विभागातील राष्ट्रीय ग्रामीण आरोग्य अभियानातील गटप्रवर्तक व आशांचे एकदिवसीय प्रशिक्षकांचे प्रशिक्षण शाहू महाराज सभागृहात झाले. त्याच्या उद्‌घाटनावेळी डॉ. पांढरे बोलत होते. जिल्हा महिला बालविकास अधिकारी डॉ. वनिता सोनगत, जिल्हा समूह संघटक प्रवीण जगताप, जिल्हा बालसंरक्षण अधिकारी योगेश मुक्कावार, युनिसेफ एसबीसी-३ चे सीमा कोनाळे, नंदू जाधव आदी उपस्थित होते. जिल्हा समूह संघटक जगताप म्हणाले, की बालविवाह निर्मूलनासाठी पंचायत विभाग, शिक्षण विभाग, आरोग्य विभाग, महिला व बालविकास विभाग, जिल्हा बालसंरक्षण कक्ष या विभागांसोबत एकत्रितरीत्या काम करून कृती आराखडा तयार करण्यात येणार आहे. यावेळी बालविवाह प्रतिबंध अधिनियम तसेच बालविवाहाची कारणे, परिणाम याबाबत सखोल माहिती देण्यात आली. जळगाव जिल्हा बालविवाह मुक्त करू अशी सर्व सहभागींनी शपथ घेतली. प्रशिक्षणाचा समारोप करतेवेळी प्रशिक्षणार्थींना प्रमाणपत्र तसेच पेन ड्राईव्ह व मॅन्यूअल इत्यादी प्रशिक्षण साहित्य देण्यात आले.