Nashik Bribe Crime : मनपा शिक्षणधिकारी धनगर अन् लिपिक ACBच्या जाळ्यात; 50 हजाराची लाच घेताना अटक

Nashik Bribe Crime : लाचखोरांसाठी कर्दनकाळ ठरत असलेल्या नाशिक लाचलुचपत प्रतिबंधक विभागाच्या जाळ्यात आज पुन्हा बडी मछली अडकली आहे.

नाशिक महापालिकेच्या शिक्षणाधिकारी सुनीता धनगर या 50 हजार रुपयांची लाच स्वीकारताना तर त्यांचे लिपिक हे पाच हजार रुपयांची लाच स्वीकारताना रंगेहाथ अटक झाले असून लाच लुचपत प्रतिबंधक विभागाने सदरची कारवाई केली आहे

नाशिक महापालिकेच्या शिक्षण विभागातील प्रशासन अधिकारी असलेल्या सुनिता सुभाष धनगर (57, रा. 801, रचित सनशाइन, उंटवाडी, नाशिक), लिपिक नीतीन अनिल जोशी (45, रा. फ्लॅट नंबर ८, पुष्पांकुर अपार्टमेंट, चव्हाण नगर, तपोवन, नाशिक ) अशी दोघा लाचखोरांची नावे आहेत

50 वर्षीय तक्रारदार हे एका शैक्षणिक संस्थेमध्ये मुख्याध्यापक पदावर कार्यरत होते. त्यांना सदरील संस्थेने बडतर्फ केले आहे. त्याकामि त्यांनी शैक्षणिक न्यायाधिकरण नाशिक येथे दाद मागितल्याने त्यांच्यावरील बडतर्फीच्या

कारवाईस स्थगिती देण्यात आली होती. तरी देखील सदरील संस्था तक्रारदारास सेवेमध्ये दाखल करून घेत नसल्याने त्यांनी याबाबत मनपा शिक्षण अधिकारी धनगर यांच्याकडे सदरील संस्थेवर कारवाई करण्यासाठी अर्ज केला होता.

हेही वाचा : Credit Card फसवणूक....काय घ्याल काळजी?

यासाठी धनगर यांनी सदरबाबत पत्र देणेकामी ५० हजार रुपयाची लाचेची मागणी केली तर, लिपिक जोशी याने सदरील पत्र बनवण्याचे मोबदल्यात पाच हजार रुपयाची लाच मागणी केली. त्याप्रमाणे दोघांनी लाचेची रक्कम स्वीकारली असता लाचलुचपत प्रतिबंधक विभागाने सापळा रचून अटक केली.

लाच लुचपत प्रतिबंधक विभागाच्या पोलीस अधीक्षक श्रीमती शर्मिष्ठा घारगे-वालावलकर, उपअधीक्षक नरेंद्र पवार यांच्या मार्गदर्शनाखाली सापळा अधिकारी पोलीस निरीक्षक संदीप घुगे, पोलीस निरीक्षक गायत्री जाधव,. एकनाथ बाविस्कर, प्रकाश महाजन, नितीन नेटारे यांनी सदरची कामगिरी बजावली.