नाशिक : साडेआठ हजार नाशिककरांचा ऑनलाइन आरक्षण सोडतीला प्रतिसाद

नाशिक : महापालिका निवडणुकांसाठी (NMC elections) मंगळवारी (ता.३१) महिला आरक्षणाची सोडत (women reservation draw) झाली. कर्मवीर दादासाहेब गायकवाड सभागृहात झालेल्या आरक्षण सोडतीसाठी सभागृहात जेमतेम प्रतिसाद होता. तर, सोशल मिडियावर (Social media) साडेआठ हजाराहून अधिक नागरिकांनी सोडत अनुभवली. (NMC election womens online reservation draw Nashik News)

महापालिकेने महिला आरक्षणाची सोडत पहाण्यासाठी नाशिककर नागरिकांना महापालिकेच्या संकेतस्थळावर, फेसबुकवर माय नाशिक पेजवर, तसेच व्हिडिओ लिंकवर ऑनलाइन पाहण्याची सोय केली होती.

अनुसूचित जाती, जमाती आणि सर्वसाधारण गटातील महिलांच्या पन्नास टक्के जागांसाठी सोडत काढण्यात आली. दादासाहेब गायकवाड सभागृहात सकाळी साडे नऊपासून अनेक इच्छुक तसेच पदाधिकारी कार्यकर्ते उपस्थित होते. याशिवाय नागरिकांची गर्दी होऊ नये त्यांना घरबसल्या सोडत पाहायला मिळावी म्हणून महापालिकेने सोशल मिडियावर सोय केली होती. महापालिकेतर्फे अनुसूचित जाती, जमाती महिला व सर्वसाधारण महिला गटाचे आरक्षण निश्चित करण्याच्या सोडतीचे मंगळवारी (ता. ३१) सकाळी दहाला ऑनलाइन प्रसारण सुरू झाले. त्यात https://fb.me/e/6xjFDs7fl या फेसबुक (Facebook) लिंकवर, तसेच https://youtube.com/c/mynmc या यू ट्यूब (Youtube) लिंकवर थेट प्रसारणाची सोय केली होती. आरक्षण सोडत दरम्यान ७ हजार ७०० नागरिकांनी फेसबुकवर हजेरी लावली, तर यू ट्युब लिंकवर ७९० नागरिकांनी महापालिकेचे आरक्षण प्रक्रियेचा घरबसल्या आनंद घेतला.