केंद्राच्या बफर स्टॉकमुळे कांदा दरावर संक्रांत; लासलगावी लिलाव

लासलगाव (जि.नाशिक) : दिवाळीच्या नऊ दिवसाच्या सुट्टीनंतर मंगळवारपासून (ता.९) येथील बाजार समितीत कांदा लिलावाला सुरवात झाली. २८ ऑक्टोबरच्या तुलनेत उन्हाळ कांद्याच्या दरात कमाल १५० रुपयांनी घट तर सरासरी भावात ३५० रुपयांची वाढ होऊन उन्हाळ कांद्याला किमान ७००, सरासरी २९०१ रूपये तर कमाल ३२५१ रुपये भाव मिळाला. दरम्यान केंद्राने नाफेडच्या माध्यमातून खरेदी केलेला बफर स्टॉक विक्रीस काढल्यामुळे तो कांदा बाजारात येणार असल्याने त्याचा परिणाम कांदा दरावर होण्याची शक्यता वर्तविण्यात येत आहे.

कांद्याच्या दरावर परिणाम होण्याची शक्यता

केंद्र सरकारने कांद्याच्या दरावर नियंत्रण आणण्यासाठी कांद्याचा बफर स्टॉक विक्रीस काढला असून कांद्याच्या दरावर त्याचा परिणाम होण्याची शक्यता आहे. अतिवृष्टीमुळे आधीच संकटात असणाऱ्या बळीराजावर केंद्राच्या या निर्णयामुळे आणखी संकट कोसळणार आहे. केंद्राने नाफेडच्या माध्यमातून खरेदी केलेल्या कांद्यातील १.११ लाख मे. टन कांदा विक्रीस काढला आहे. त्यामुळे कांद्याचे दर किमान सहा ते सात रूपये किलोवर येण्याची शक्यता असल्याचे सांगितले जात आहे.

लासलगावी लिलाव सुरू, किमान २९०० रूपये दर, ३५० रुपयांनी वाढ

दिवाळीच्या सुटीनंतर आजपासून बाजार समिती सुरू झाली. उन्हाळ कांद्याची १३ हजार ९५३ क्विंटल आवक होऊन बाजारभाव किमान ७००, कमाल ३१०० रूपये तर सरासरी २५५० रुपये प्रति क्विंटल असा दर मिळाला होता. लाल कांद्याची अंदाजे ४० क्विंटल आवक होऊन बाजारभाव किमान २९६०, कमाल ३१०२ तर सरासरी २९६० रूपये प्रति क्विंटल भाव मिळाले.

व्यापारी असोसिएशनचे अध्यक्ष व बाजार समितीचे संचालक नंदकुमार डागा यांच्या हस्ते भगरीबाबा यांच्या प्रतिमेचे पूजन तर गोटूशेठ राका यांच्याहस्ते श्रीफळ वाढवण्यात आले, यानंतर कांदा लिलावाला सुरुवात झाली. बाजार समितीचे सर्व लिलाव प्रमुख सुनील डचके, कांदा लिलाव प्रमुख दत्तू होळकर, व्यापारी मनोज जैन, प्रवीण कदम, दत्तू खाडे, अफजल शेख, संतोष माठा, ओम चोथानी व शेतकरी उपस्थित होते