दुचाकी व मोबाईल चोरांच्या पोलिसांनी आवळल्या मुसक्या

सुरगाणा (जि. नाशिक) : घरातून मोबाईलची चोरी झाल्याचे लक्षात येताच विष्णू पवार यांनी पोलिस ठाण्यात मोबाईल चोरी झाल्याची तक्रार नोंदवली होती.

पोलिसांनी तातडीने तपासाची चक्रे फिरवून पोलिस हवालदार प्रवीण सानप, नाईक विश्वनाथ काकड यांनी संशयित कमलाकर पवार (२१, शांतीनगर), सुनील गांगुर्डे (२० दवाखानापाडा), अजय सोलंकी (२७ गांधीनगर) हे सुरगाणा शहरातील तर चेतन चव्हाण (२०, मालगव्हाण) यांना चौकशीसाठी ताब्यात घेतले.

पोलिसांनी आपल्या खाक्या दाखविताच त्यांनी चोरीची कबुली दिली. त्यांच्याकडून पोलिसांनी १७ मोबाईल व ७ दुचाकी हस्तगत केल्या आहेत. या चौघांना दिंडोरी न्यायालयात उभे केले असता त्यांना जामीन मंजूर करण्यात आला, परंतु सुनील गांगुर्डे यास वेळेत जामीनदार न मिळाल्याने त्याची रवानगी नाशिकरोड कारागृहात करण्यात आली आहे.

कमलाकर पवार याच्यावर यापूर्वीही अनेक चोरीच्या (Thief) घटनांमध्ये गुन्हे दाखल झाले आहेत. या चौघांनी वणी, सुरगाणा, बोरगाव, कळवण येथून दुचाकी चोरल्याचा संशय आहे. यामध्ये तीन दुचाकीवर नंबर नसून ४ दुचाकीवर बनावट नंबर आढळून आले आहेत. याबाबत पोलिस तुळशीराम चौधरी, एम. के. पवार हे तपास करीत आहेत