वाहss गुरुजी! 7 वर्षांपासून भरताय विद्यार्थ्यांचा आरोग्यविमा

नाशिक : केटीएचएम महाविद्यालयातील (KTHM College) प्रा. अविनाश दवंगे यांनी आपले जन्मगाव जऊळके वणी येथील मविप्र संस्थेच्या शाळेतील ३० विद्यार्थ्यांचा वार्षिक आरोग्‍य विमा हप्ता भरला आहे. हप्‍त्‍यापोटीचा धनादेश मविप्र संस्थेच्या सरचिटणीस श्रीमती नीलिमाताई पवार यांच्याकडे त्यांनी सुपूर्त केला. (Latest Marathi News)

हा संकल्‍प अव्याहतपणे सुरु...

अवघे दोन वर्षांचे असताना पितृछत्र व पंधराव्या वर्षी त्‍यांचे मातृछत्र हरपले होते. समाजाचे व जन्म गावाचे ऋण व्‍यक्‍त करताना गेल्या सात वर्षापासून जऊळके वणी येथील मविप्र शाळेतील विद्यार्थ्यांचा दरवर्षी आरोग्य विमा काढण्याचा संकल्प केला. हा संकल्‍प अव्याहतपणे सुरु आहे. त्यांनी काढलेल्या मविप्र आरोग्‍य विम्यामुळे अनेक गरजू विद्यार्थी, त्यांच्या पालकांना मदत झाली आहे. सामाजिक बांधिलकीचे भान ठेवत गरजू विद्यार्थ्यांना मदतीचा हात पुढे करणाऱ्या प्रा. दवंगे यांचे कौतुक श्रीमती पवार व संस्थेच्या पदाधिकारी, संचालक मंडळाने केले आहे. धनादेश सुपूर्द करतांना संस्थेचे शिक्षणाधिकारी सी. डी. शिंदे, अभियंते श्री.तापकिरे उपस्थित होते.