Project Durga : कुटुंबातील सदस्‍यांच्‍या सतर्कतेने यशस्‍वी उपचार

एकत्र कुटुंबात राहत असताना प्रत्‍येक सण- उत्‍सव अतिशय जल्‍लोषात साजरा केला जात होता. कोरोना महामारीच्‍या काळात लॉकडाउनमध्ये सर्व घरी बसून असताना कुटुंब सदस्‍य एकमेकांसोबत भरपूर वेळ घालवत होते. त्‍यातच छाया अहिरे यांना स्‍तनात गाठ जाणवली. आधीच कोरोना महामारीमुळे भितीचे वातावरण असताना सुरवातीला संभ्रम होता.

परंतु कुटुंबातील महिला सदस्‍यांशी चर्चा करत त्‍यांच्‍या आग्रहास्‍तव व सतर्कतेमुळे त्‍यांनी चाचण्या केल्‍या. स्‍तनाच्‍या कर्करोगाचे निदान झाले, व सदस्‍यांच्‍या पाठबळामुळे कर्करोगावर यशस्‍वी मातदेखील केली. (Project Durga Successful treatment of breast cancer on chhaya Ahire nashik Latest Marathi News)

२०२१ मध्ये कोरोना महामारीमुळे आरोग्‍य व्‍यवस्‍था विस्कळित झालेली होती. लॉकडाउनमुळे सर्व घरीच बसून होते. छाया अहिरे यादेखील आपल्‍या कुटुंबासोबत सुखासुखी जीवन जगत होत्‍या. एकेदिवशी त्‍यांना स्‍तनात गाठ असल्‍याचे आढळून आले. कुटुंबातील अन्‍य महिला सदस्‍यांशी चर्चा केल्‍यानंतर तपासणी करण्याचा आग्रह करण्यात आला. परंतु बाहेरील परिस्थिती बघता, रुग्‍णालयात जाण्याबाबत सौ. अहिरे यांना भीती वाटत होती. परंतु, सदस्‍यांनी मनोबल वाढवत तपासणीसाठी नेले.

तपासणी अहवालात कर्करोगाचे निदान झाल्‍यानंतर त्‍या प्रचंड घाबरून गेल्‍या होत्‍या. परंतु अशा परिस्थितीत त्‍यांना धीर देत, सर्वांनी मिळून कर्करोगाशी लढण्याचा निर्धार केला. केमो, रेडिएशन व शस्त्रक्रिया अशा प्रत्‍येक टप्प्यावर सौ. अहिरे यांना त्‍यांच्‍या कुटुंबियांनी प्रोत्‍साहन दिले. त्‍यांच्‍या पाठबळामुळेच या संकटातून बाहेर येऊ शकल्‍याची भावना त्‍यांनी बोलून दाखविली. कर्करोगाचे निदान हा आयुष्यातील कठीण प्रसंग होता. परंतु आता सर्वकाही सामान्‍य झालेले असून, पुन्‍हा आधीसारखे जीवन जगत असल्‍याचे त्‍यांनी सांगितले.