Nursing CET Exam: नर्सिंग सीईटीच्‍या नोंदणीची 29 पर्यंत मुदत! नोंदणी प्रक्रियेला सुरवात

नाशिक : राज्‍यभरातील नर्सिंग महाविद्यालयात बी.एस्सी (नर्सिंग) या पदवी अभ्यासक्रमास सीईटी परीक्षेच्‍या माध्यमातून प्रवेश दिले जाणार आहेत. शैक्षणिक वर्ष २०२४-२५ साठी सीईटी परीक्षेला प्रविष्ट होण्याकरिता नोंदणी प्रक्रिया सुरु झाली आहे.

विद्यार्थ्यांना २९ फेब्रुवारीपर्यंत ऑनलाइन पद्धतीने अर्ज दाखल करता येतील. शिक्षणशास्‍त्र शाखेच्‍या अभ्यासक्रमांना तिसऱ्यांदा मुदतवाढ दिली असून, गुरुवार (ता.१५) पर्यंत विद्यार्थी विविध सीईटीसाठी अर्ज करू शकतील. (Registration deadline for Nursing CET exam till 29th Start registration process nashik news)

सीईटी सेलतर्फे विविध अभ्यासक्रमांच्‍या प्रवेशासाठी सीईटी परीक्षेचे आयोजन केले जाणार आहे. टप्‍याटप्‍याने अर्ज प्रक्रिया पार पडते आहे. गेल्‍या शैक्षणिक वर्षापासून बी.एस्सी नर्सिंग या अभ्यासक्रमासदेखील राज्‍यस्‍तरावरील सीईटी परीक्षेच्‍या कामगिरीच्‍या आधारे प्रवेश दिले जात असतात. इतर विविध शिक्षणक्रमांच्‍या नोंदणी प्रक्रिया अंतिम टप्यांत आहे.

दरम्‍यान नर्सिंग अभ्यासक्रमाच्‍या सीईटी परीक्षा नोंदणीला सुरवात झाली असून, सध्याच्‍या वेळापत्रकानुसार २९ फेब्रुवारीपर्यंत विद्यार्थी ऑनलाइन अर्ज भरू शकतील. ऑनलाइन शुल्‍क भरण्यासाठी १ मार्चपर्यंत मुदत असेल.

शिक्षणशास्‍त्र शाखेतील बीएड-एम.एड इंटिग्रेटेड (३ वर्षे), एम.एड., एम.पी.एड., बी.एड (नियमित व विशेष) आणि बी.पी.एड. या अभ्यासक्रमांच्‍या सीईटीकरीता तिसऱ्यांदा मुदतवाढ दिली आहे. काल (ता.१२) नोंदणी मुदत संपत असताना आता पात्रताधारक विद्यार्थ्यांना गुरुवार(ता.१५) पर्यंत अर्ज करून शुल्‍क भरता येईल.