Nashik News : रिक्षाचालकाचा प्रामाणिकपणा; एक लाखाचे दागिने केले परत

जुने नाशिक : समाजात माणुसकी आणि प्रामाणिकपणा राहिला नाही, असे म्हटले जाते. मात्र नानावली येथील रिक्षाचालक यास अपवाद ठरला आहे.

प्रवासादरम्यान रिक्षाचालक इरशाद जाहीर अली यांच्या रिक्षात सातपूर येथील सनी प्रकाश त्रिभुवन एक लाख रुपये किमतीचे दोन तोळे सोन्याचे मंगळसूत्र विसरले होते. (Rickshaw drivers honesty Jewelry worth one lakh returned to police Nashik News)

इरशाद यांच्या लक्षात येताच त्यांनी सोन्याचे मंगळसूत्र भद्रकाली पोलिसांच्या हवाली केले. वरिष्ठ पोलिस निरीक्षक गजेंद्र पाटील यांच्या मार्गदर्शनात सहाय्यक पोलिस निरीक्षक सत्यवान पावर, हवालदार संदीप शेळके, महेशकुमार बोरसे, नारायण गवळी यांनी संबंधित व्यक्तीचा शोध घेतला असता, त्रिभुवन यांच्या मालकीचे मंगळसूत्र असल्याचे निष्पन्न झाले.

त्यांना पोलिस ठाण्यात बोलावून खात्री करत मंगळसूत्र परत केले. रिक्षाचालकाच्या प्रामाणिकपणाचे भद्रकाली पोलिसांसह त्रिभुवन यांनी कौतुक केले. पोलिसांकडून इरशाद यांचा सत्कार करण्यात आला.