अन् आता कामे उरकण्याची लगबग; गंगाघाटावरील कामांची ‘स्मार्ट’ स्थिती

नाशिक : कोणत्याही परिस्थितीत गोदावरीची पाणीपातळी वाढण्यापूर्वी गंगाघाटावरील स्मार्ट कामे पूर्ण करण्याचा चंग स्मार्टसिटी (Smart City) कंपनीने केला आहे. परंतु, घाईघाईने उरकलेल्या या कामांचा दर्जाही तपासणे गरजेचे आहे. कारण गतवर्षी पहिल्याच पावसात नदीकाठी बसविण्यात आलेल्या अनेक फरशा वाहून गेल्या होत्या. (Smart City Company has completed smart works on Gangaghata before water level of Godavari rises Nashik News)

शहराच्या सर्वच भागात स्मार्टसिटीअंतर्गत भूमिगत गटारांसह रस्त्याच्या काँक्रिटीकरणाचे कामे जोरात सुरू आहेत. याशिवाय गंगाघाटाववर नदीच्या दुतर्फा मोठ्या प्रमाणावर विकासकामे सुरू आहेत. परंतु, ही कामे अतिशय संथगतीने सुरू असल्याने स्थानिक व्यावसायिक व वाहनधारक त्रस्त आहेत. रामकुंड परिसरासह सांडव्यावरील देवी मंदिराजवळ त्यामुळे वाहतुकीची कोंडीही अनुभवण्यास मिळत आहे. सध्या कपूरथळा मैदानावर फरशा बसविण्याचे काम सुरू असून, हे काम अक्षरश: उरकले जात असल्याचे दिसून येते.

छत्रीची दुरवस्था

रामकुंड परिसरातील गांधी ज्योतीमागील छत्रीची सध्या दुरवस्था झाली असून, वरील बाजूचे काँक्रिटीकरण पुराच्या पाण्यामुळे वाहन गेले आहे. त्यामुळे छत्रीला बकालपणा आला आहे. स्मार्टसिटीच्या कामाबरोबरच या छत्रीला पुनर्वैभव मिळवून द्यावे, अशी अपेक्षा स्थानिकांनी व्यक्त केली आहे.

वाघाडीत कचरा टाकणे सुरूच

मध्यंतरी महापालिकेच्या स्वच्छता विभागाकडून वाघाडी नाल्यातील कचरा काढण्यात आला. परंतु, त्यानंतरही वाघाडी नाल्यात मोठ्या प्रमाणावर कचरा टाकणे सुरूच आहे. गोदावरी व वाघाडीच्या संभाव्य पाणी पातळीत वाढ होण्यापूर्वीच हा कचरा काढणे गरेजेचे आहे. अन्यथा पुराच्या पाण्याबरोबरच हा कचरा मोठ्या प्रमाणावर गोदापात्रात वाहून येण्याची शक्यता आहे.