सापडलेला धनादेश परत करत शिक्षकाने घडविले प्रामाणिकपणाचे दर्शन

नामपूर (जि. नाशिक) : ‘काळ बदलालाय... आता कोण प्रामाणिक राहिलंय’ असा सूर अनेकवेळा ऐकायला मिळतो. परंतु, आजच्या जमान्यातही प्रामाणिकपणा, माणुसकी टिकून आहे. याची प्रचिती देणारे उदाहरण पिंपळनेर येथील उपक्रमशील प्राथमिक शिक्षकाच्या कृतीतून समोर आले आहे.

रस्त्यावर सापडलेला २४ हजार रुपयांचा बेअरर धनादेश बँक प्रशासनास परत करून त्यांनी चांगुलपणाचे दर्शन घडविले. चिंचदर (ता. बागलाण) येथील जिल्हा परिषदेच्या प्राथमिक शाळेत कार्यरत असलेले शिक्षक सध्या उन्हाळ्याच्या सुट्ट्यांमुळे पिंपळनेर (ता. साक्री) आपल्या मूळगावी वास्तव्यास आहेत.

आपल्या खासगी कामानिमित्त सामोडे रस्त्याने जात असताना त्यांना २४ हजार रुपये मूल्याचा हस्ती बँकेचा जे. टी. ऑटोमोबाईल नावाचा बेअरर चेक सापडला. त्यानंतर त्यांनी तातडीने चेक सोबत घेवून हस्ती बँक गाठत संबंधित शाखाधिकाऱ्यांकडे सुपूर्द केला. त्यांच्या प्रामाणिकपणाबद्दल शाखाधिकारी जी. एम. बोरसे यांच्या हस्ते त्यांचा सत्कार करण्यात आला. या वेळी शिक्षक डी. डी. महाले, शिरीष बिरारीस आदी उपस्थित होते. कैलास बच्छाव यांच्या प्रामाणिकपणाबद्दल त्यांचे कौतूक होत आहे.